भांगरभूंय | प्रतिनिधी
पूर्णानंद च्यारी : कोंकणी अकादेमीच्या अध्यक्षपदार नेमणूक
भांगरभूंय । प्रतिनिधी
पणजी : कोंकणी अकादेमीचो शिक्षणीक वावर वाडोवपा सयत चडांत चड लोकां मेरेन अकादेमीचो वावर पावोवपा कडेन आपलो भर आसतलो, अशें कोंकणी अकादेमीचे नवे अध्यक्ष डॉ. पूर्णानंद च्यारी हांणी म्हणलां. गोवा कोंकणी अकादेमीचे अध्यक्ष म्हूण तांची नेमणूक जाल्या. तीन वर्सां खातीर तांची नेमणूक आसा.
अध्यक्ष म्हूण डॉ. च्यारी हांचे सयत रमेश घाडी, संतोष केरकार आनी माया खरंगटे हांची वांगडी म्हूण नेमणूक जाल्या. प्रा. अरूण साखरदांडे हांणी कोंकणी अकादेमीच्या अध्यक्षपदाचो राजिनामो दिले उपरांत वसंत सावंत हांची कार्यकारी अध्यक्ष म्हूण नेमणूक जाल्ली. आतां डॉ. च्यारी हांची पुराय वेळ अध्यक्ष म्हूण नेमणूक जाल्या. कोंकणी अकादेमीचो वावर नेटान सुरू आसा. हे फुडें शिक्षणीक वावर वाडोवपा कडेन आपलें लक्ष आसतलें. अकादेमीचो वावर, येवजण्यो ह्यो विद्यार्थी तशेंच शिक्षणीक संस्थां मेरेन पावपाक जाय. साहित्य, संशोधन तशेंच सगळ्या वाठारांत दर्जात्मक वावर वाडपाक जाय, अशें पूर्णानंद च्यारी हांणी सांगलें. कोंकणी ही गोंयची राजभास आसा. राजभाशेचो वापर प्रशासन तशेंच हेर कामकाजांत करपा खातीर सरकारान वावर सुरू केला. तज्ञांचो सल्लो घेवन अध्यक्ष ह्या नात्यान आपूण राजभाशेच्या कार्यवाबी विशीं सरकाराक तरेकवार सुचोवण्यो करतलों. राजभाशेची सरकारी वावरांत नेटान कार्यवाही करपाची प्रक्रिया सुरू जाल्या, अशें तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
