कोंकणीच आवयभास, राजभास  

भांगरभूंय | प्रतिनिधी

पत्रभूंय

डाॅ. प्रमोद सावंत

मुख्यमंत्री.

मानादिक दोतोर,

देवनागरी लिपींतली कोंकणी हीच आवयभास, तीच प्रदेसाची भास ही जाप  विधानसभेंत तुमी दिली. मराठी राजभासेच्या विशयाक तुमची जापच ना. तुमी खरे शिटूक. तुमकां देव बरें करुं.  

शिक्षणात रोमी कोंकणी लिपी हाडपाच्या थारावक तुमी विधानसभेंत दिल्ली जाप जितली तोखणायेची तितलेंच मराठीचो विशय मांडूंक दिवप तोखणायेचें.  तुमची, आमची आवयभास कोंकणी हीच प्रदेसाची भास, तीच गोंयची राजभास, ती देवनागरी कोंकणीच. गोंयच्या राजभास कायद्यांत तें  सांगलां. तेंच तुमी जापेंतल्यान सांगपाची धिटाय दाखयली. ही भांगरभूंय तुमची सदांच उपकारी आसतली. 

राजभास दिसाचे कार्यावळींत तुमकां आदले आमदार अॅड. उदय भेंब्रे हांचें यादींचो कुरपणो पुस्तक दिल्लें. त्या पुस्तकांत राजभास थारावाची म्हायती आसा. मात्शी त्या थारावांतली इंग्लीश भास काडून उडोवपी विधेयक मांडपाक आमदार कार्लुसबाब फेरेरांक सांगात.  

रोमी कोंकणी शिक्षणात जाय हो थाराव मांडपी अॅड. कार्लोसबाब हालींच मेळ्ळे. तांकां राजभास कोंकणीच्या थारावाची एके वळींत म्हायती दिली. राजभास थारावांत रोमी कोंकणी, मराठीय आसा हेंय सांगलें. 

आमदार जीतबाब आरोलकार मराठी राजभासेचो विशय कोंकणीत मांडपी. कसली ही मस्करी? हे फुडें विधानसभेंत रोमी, मराठीचो विशय आयल्यार एकच जाप दियात “राजभास कायदो वाचात, रोमी, मराठीपरस गोंयकारांक जांचपी, ताकतीक आशिल्ले विशय मांडात.”  कार्लोसबाब परतून रोमीचो, जीतबाब मराठीचो विशय मांडचे नात अशें न्हय.    

आदले मुख्यमंत्री प्रतापसिंह राणे, अॅड. लुईझिनबाब फालेरो, पयलींचे आमदार अॅड. उदयबाब भेंब्रो, तेन्नाचे सभापती दयानंदबाब नार्वेकार हांकां मेळपाची सुचोवणी तांकां करची.  

राजभास कायदो विधेयक विधानसभेंत मांडपी आदले मुख्यमंत्री प्रतापसिंह राणे अॅडव्होकेट नाशिल्ले, पूण ते तुमचे वरींच, म्हजे आदर्श. राजभास कायद्याची बांदावळ करतना विरोधी पक्ष मुखेली अॅड. रमाकांत खलप आशिल्ले. शेतकाममंत्री अॅड. रवीबाब नाईक तेन्नाचे विरोधक, पंचायतमंत्री अॅड. मावीन गुदिन्हो राजभास कायद्याचे समर्थक आयज तुमचेबाराबर. भिवपाची गरजच ना. तेन्ना उलोवपाचे भाशेक एक मर्याद आसताली. तीच भास तुमी सगल्यांक शिकयात. उसरां मेरेन विधानसभेचें कामकाजय जालां गरज पडल्यारुच. शेनवारा विधानसभेच्या वावराची तजवीज करात. 

सुहासिनी प्रभुगांवकार