भांगरभूंय | प्रतिनिधी
कोंकणी तांत्रीक अणकाराच्या प्रमाणपत्र अभ्यासक्रमाचें उक्तावण
पणजी : गोंयांत कोंकणी विंगड विंगड तरेन उलयतात. हाका लागून तिच्या प्रमाणीकरणाची धांवपळ नाका आनी आग्रोय नाका. मात प्रमाणीकरण तशेंच हेर वावर नेटान चालूच दवरपाक जाय. मराठीचें प्रमाणीकरण जावपाक लेगीत बरोच वेळ लागिल्लो, अशें मत एनआरआय आयुक्त ऍड. नरेंद्र सावयकार हांणी उक्तायलें. ते खांडोळ्या सरकारी म्हाविद्यालयांत कोंकणी तांत्रीक अणकाराच्या प्रमाणपत्र अभ्यासक्रमाच्या उक्तावणाक मुखेल सोयरे ह्या नात्यान उलयताले. खांडोळें सरकारी म्हाविद्यालयान राजभास संचालनालयाच्या जोडपालवान ह्या अभ्यासक्रमाचें आयोजन केलां.
बर्याच संघर्शा उपरांत कोंकणी ही गोंयची राजभास जाली. ती लोकांची भास आसली तरी प्रशासन तशेंच न्यायालयांत तिचो वापर जावपा खातीर बरेच कश्ट घेवचे पडटात. सरकाराचे आदेश, घोशणा तशेंच धोरणां लोकां मेरेन लोकांचे भाशेंत पावपाक जाय. हाका लागून सरकारी धोरणां, आदेश, निवाडे कोंकणीत अणकारीत करप हें एक आव्हान आसा. हाचे खातीर राजभास संचालनालय तशेंच संबंधीतांनी येत्न सुरूच दवरचे. आदले न्यायाधीश नरेंद्र चपळगांवकार हांणी न्यायालयाच्या कामकाजांत थळावे भाशेचो आग्रो धरिल्लो. एफआयआर तशेंच पंचनाम्याची नोंद लोकांक कळटा तेच भाशेंत जावपाक जाय, अशें ते म्हणटाले. साश्ट वाठारांत जशी कोंकणी उलयतात तशी पेडणें वाठारात उलय नात. हाका लागून अमूक एका शब्दा विशीं कोणे आग्रो धरचो न्हय, अशें तांणी सांगलें.
राजभास संचालक मेघनाथ पोरोब राजभास कायद्याच्या कार्यवाये खातीर अनुवादकांची गरज आशिल्ल्याचें सांगलें. डॉ. प्रकाश वजरीकार हांणी अभ्यासक्रमाचो हेत आनी स्वरूप स्पश्ट केलें. शिवाजी महाराजान लेगीत आपल्या शासनकाळांत प्रशासनांत वावुरपी शब्दांची सूची तयार केल्ली, अशें डॉ. वजरीकार हांणी सांगलें.
कोंकणी तांत्रीक अणकार प्रमाणपत्र अभ्यासक्रम शेनवार मेरेन चलतलो. अभ्यासक्रमाच्या उक्तावण सुवाळ्याक राजभास संचालक मेघनाथ पोरोब, उपप्राचार्य लेक्टर डिकोस्ता, कोंकणी विभागाचे मुखेली डॉ. वजरीकार आनी हेर मानेस्त हाजीर आशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
