भांगरभूंय | प्रतिनिधी
कुडचडेंच्या मॅथ्यु डिकाॅस्ताची बातमी आयकून जिवाक धक्कोच बसलो. तो म्हजो जिवाभावाचो आमीग. कोंकणी खातीर कितेंय करुंक तयार आशिल्ल्या मॅथ्यु बाबाक काळजाचो खर आताक येवन तो देवाधीन जालो आनी कोंकणीचो आनीक एक पर्जळीत तारो अस्ताक गेलो.
कुडचडें हो कलाकारांचो गांव. ह्या कलाकारांक एकठांय करुंक ताणें कुडचडें कोंकणी केंद्र घडयलें आनी दाल्गादो कोंकणी आकादेमी तर्फेन एक खास ‘गोंयचो पर्मळ’ आंक काडून थंयच्या बरोवप्यांक आनी कोंकणी मोग्यांक एकठांय हाडपाचो यत्न केलो. आपलें पयलेंच पुस्तक ‘लियो लिंदा’ उजवाडा हाडचे खातीर ताणें खूब धडपड केली आनी तें उजवाडायतना भौशीक बांदकाम मंत्री निलेश काब्रालाक मुखेल सोयरो म्हूण हाडून समाजा खातीर आपूण कितले लागिंचें संबंध दवरता हें दाखोवन दिलें.
काजाराची साऊद उभारप, कांतारां गावप आनी सुत्रसंचालन करप हे ताचे खाशेले गूण. ह्या गुणां वरवीं ताणें आपली वळख जायती वाडयल्ली. राजकी मळावेले व्यक्ती धरून समाजांतल्या बऱ्या- बऱ्या मनशां कडें ताचें नातें आशिल्लें. तो खूब शिस्तिचो मनीस आशिल्लो. ताच्या घरांत मागण्याचें वातावरण वसतालें. वेळार जेवण, वेळार मागणें, खंयसरूय गेल्यार घराकडें संपर्क आदी. गजालीं वरवीं ताणें आपल्या कुटुंबांतूच न्हय तर तो आसता थंय ताचें पालन जाता, हाची जतनाय घेतालो. ताचे दोग पूत, पायटी आनी जेकरुबेन तशीच धूव लुर्ड्स मोनालिजा सदांच ताका खाल्तीं आशिल्लीं, तशीच ताची घरकान्न आयरीन. तांचो सदांच ताका हुस्को आसतालो. कोंकणी खातीर तो कसलोय त्याग करतालो. थोडीं वर्सां नोकरे खातीर तो परदेसांत आशिल्लो. थंय लेगीत तो कोंकणीची सेवा करतालो. तियात्र ताका खूब लागींचो. हालींच ताणें ‘कोंकणी दायज’ सातोळ्या खातीर बरोवप सुरू केल्लें आनी तातुंत उजवाडा येवपी कांय ओपारींचे तो अणकार करतालो. सत्तर वर्सांचे पिरायेर लेगीत इतलो सुडसुडीत.
देवाक जाय तें मनशाक मेळना. जल्माक येता तो मरताच. ताचेर सदांच संवसारांत आसप्यांचो हक्क आसना. ही देवाची खोशी मानून घेवन समेस्त कोंकणी कूळ मॅथ्यु डिकाॅस्ताक आर्गां ओंपता आनी ताका देवान रोखडेंच सर्गीचें सूख फावो करुंक प्रार्थना करतां. अस्ताक गेल्ल्या कोंकणीच्या ताऱ्याक आमचें नमन!
– विन्सी क्वाद्रूस
9822587498
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
