भांगरभूंय | प्रतिनिधी
उदय भेंब्रे : कोंकणी संस्था आनी कार्यकर्ता मेळाव्यांत मार्गदर्शन
भांगरभूंय । प्रतिनिधी
फोंडें : फाटल्या साबार वर्सां सावन कोंकणी चळवळीची दिशा ही खूबशा स्थित्यंतरांतल्यान गेल्या. कोंकणी चळवळीक एक परंपरा आसा. वैचारीत, संघटनात्मक आनी संघर्शात्मक चळवळींतल्यान कोंकणीन आयज आपली सुवात मेळयल्या. आयज आमच्या कार्यकर्त्यांनी आक्रमक जावपाची कांयच गरज ना. मात आमच्या भाशेचे अनादर जाता जाल्यार फुर्योज जायनासतना, वैचारीक पांवड्यार प्रत्युत्तर हें दिवपाकूच जाय. तें काम आयच्या कार्यकर्त्यांनी करपाक जाय. तेन्नाच्या काळाची गरज आशिल्ली म्हूण आमी रस्त्याचेर देंवले, मात आयज आमकां रस्त्याचेर देंवपाची कसलीच गरज ना. शक्ती प्रदर्शनाची गरज ना. आमचे कडेन खूबशे उपाय उपलब्ध आसात. त्या माध्यमांतल्यान कोंकणीची सुवात अबाधीत दवरुया. कोंकणी भाशेच्या आनी कोंकणी संस्थांच्या उत्कर्षा खातीर निसुवार्थीपणान काम करपी खूब कार्यकर्ते आसात. जे सदांच प्रसिद्धी पासून चार हात पयस रावले. मात आपल्या वावरांतल्यान तांणी कोंकणी चळवळीक प्रेरणा दिली, अशें ज्येश्ठ कोंकणी साहित्यीक उदय भेंब्रे हांणी सांगलें.
कोंकणी भाशा मंडळ आनी अंत्रूज घुडयो हांणी जोडपालवान आयोजीत केल्ल्या कोंकणी संस्था आनी कार्यकर्ता मेळाव्यांत भेंब्रे उलयताले. कोंकणीचे कार्यकर्ते प्रा. नित्यानंद नायक हांच्या उगडासा निमतान हे कार्यावळीचें आयोजन केल्लें. ह्या वेळार माचयेर कोंकणी भाशा मंडळाची अध्यक्ष रत्नमाला दिवकार, अंत्रूज घुडयो संस्थेचे प्रतिनिधी शर्व बिचे, भाशा मंडळ म्हाल समन्वयक चेतन खेडेकार हाजीर आशिल्ले.
आतां मेरेन कोंकणी चळवळींत खूबश्यो संस्था घडल्यात. आयज तांणी जागरूक रावप गरजेचें आसा. कोंकणीचेर अन्याय जाता जाल्यार त्या अन्याया आड तात्वीक पांवड्यार आवाज काडपाकूच जाय. कोंकणी संबंदांत सरकारान धोरणां आंखून दिल्या, कांय कायदे केल्यात. त्या धोरणांची त्या कायद्यांची अंमलबजावणी जाता काय ना तें पळोवपाचें काम आयच्या संस्थांनी करपाक जाय. आयज इतलें जरी केलें जाल्यार कोंकणी विरोधकांचो आवाज सासणाचो चेपतलो, अशें भेंब्रे हांणी सांगलें.
प्रास्ताविकाच्या उलोवपांत रत्नमाला दिवकार हांणी नित्यानंद नायक हांच्या वावराचो आनी कोंकणी चळवळींतल्या योगदानाचो नियाळ घेतलो. अशे कार्यकर्ते परतून निर्माण जावपाक जाय, अशें सांगलें. युगा पावसे हांणी सुत्रसंचालन केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
