भांगरभूंय | प्रतिनिधी
पणजीः गोंयांत पोस्ट खात्यांत गोंयकारांकूच नोकर्यो मेळच्यो म्हण कोंकणी गिन्यान प्रमाण पत्र सक्तीचें करपाक पोस्ट खात्यांक सांगलां. हे खातीर गोवा कोंकणी अकादेमी कोंकणी उलोवपाचें आनी प्रमाणपत्र दितलें. जांणी धाव्वेचें शिक्षण मराठींत केलां तांणी चाचणी दिवन हें प्रमाणपत्र घेवपाक जाता, अशें मुख्यमंत्री डॉ. प्रमोद सावंत हांणी सांगलें.
शुन्य प्रहरा वेळार फातोड्डेंचे आमदार विजय सरदेसाय हांणी पोस्ट खात्यांत नोकरेचो विशय काडिल्लो. हालींच ५० पोस्टमनांक काडून त्या जाग्यार नवीन पोस्टमनांची भरती केल्या. ५० मदले ४० जाण गोंयकार आसले जांणी १५- २० वर्सा सेवा दिल्या. तांचे सुवातेर आतां महाराष्ट्रातले कर्मचारी गोंयात भरती जाल्यात. तांणी लांच दिवन नोकर्यो घेतल्यात हाचो म्हजे कडेन पुरावो आसा, असो आरोप आमदार विजय सरदेसाय हांणी केलो.
हाचेर जाप दितना डॉ. सावंत हांणी सरदेसाय हांचे आरोप भायरायले.
पोस्ट खात्यांत गोंय आनी महाराष्ट्र एक क्षेत्र आशिल्ल्यान जे भुरगे पोस्टमन पदा खातीर अर्ज करताले तांचे धावेचे गुणपत्रिकेचेर मराठी विशय आसल्यारूच तांकां नोकरी दिताले. देखून चडशे गोंयकार भायर पडून महाराष्ट्राचे भुरगे कामाक रुजू जाताले, अशें मुख्यमंत्र्यान सांगलें.
हांवें पोस्ट खात्याक स्पश्ट निर्देश दिल्यात की गोंयांत ज्या भुरग्यांक कोंकणी कळटा तांकांच ह्यो नोकर्यो दिवंच्यो. आतां तांणी गुणपत्रिका दाखोवचें सोडून गोवा कोंकणी अकादेमींतल्यान कोंकणी गिन्यानाचें प्रमाणपत्र दाखोवचें. जांणी आपलें शिक्षण मराठींत केलां तांणी कोंकणी अकादमींत वचून कोंकणी वाचपाची आनी बरोवपाची चाचणी दिवची. तांकां हें प्रमाणपत्र मेळटलें, अशी म्हायती मुख्यमंत्र्यान दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
