भांगरभूंय | प्रतिनिधी
सगल्यां खातीर 70 वर्सांची पिराय खाशेली. कारण जायत्या जाणांनी हे पिरायेचेर निवृत्ती स्विकारल्या. कामाचो ताण आनी जापसालदारकी उणी जाता. भुरग्यांच्यो कुटुंबीक जापसालदारक्यो जशें की शिक्षण, लग्न ह्योय पुराय जातात. निवृत्ती हो, विसव घेवपाचो आनी उरिल्ली जीण आनंदान सारपाचो वेळ. नातवंडां वांगडा खेळपाचो, जोडीदाराक पुराय वेळ दिवपाचो, संवसाराची भोंवडी करपाचो, अध्यात्मीक मार्ग ह्या काळांत आपणावपाचो आसता. आवय- बापूय, सोयरे, इश्ट कम्फर्ट झोनांत येतात. जिविताच्या ह्या टप्प्यार ते चड सुखी जावचें म्हूण आमी तांकां परबीं भेटयतात. कोंकणीचे निश्ठावंत सेवक आनी समीक्षक सखाराम शेणवी बोरकार 70 वो जल्मदीस मनयतात. अमेरिकेंतल्या सां फ्रान्सिस्को शारांत 7 जुनाक तांचें ‘जिबेवेली जतनाय (म्हणी फाटली काणी)’ पुस्तकाचें लोकार्पण जातलें.
सखाराम बोरकार हांचो जल्म मडगांवां जालो. कवी, साहित्यीक, समिक्षक आनी अनुवादक अशें हें भोव आयामी व्यक्तीमत्व.
तांणी मुंबय विद्यापिठाची रसायनशास्त्र आनी कायद्याची पदवी घेतल्या. तांणी गोंय विद्यापिठांतल्यान कोंकणी विशयांत पदव्युत्तर पदवी (एमए) आनी व्यवस्थापन, कामगार कायदो आनी कर (टॅक्सेशन) ह्या विशयांत पदविका घेतल्यात. ते एका भोवराष्ट्रीय कंपनींतल्यान अधिकारी पदावेल्यान निवृत्त जाल्यात.
तांचें लिखाण ‘भांगरभूय’, बिम्ब’, ‘जाग’, ‘गोमंतक’, ‘लोकमत’ आदीं दिसाळीं, नेमाळ्यांनी उजवाडाक येता. आकाशवाणी पणजी केंद्राचेर तांचे कविता वाचनाचे आनी उलोवपांचे कार्यक्रम जातात. ते सध्या ‘जाग’ नेमाळ्याचे मुखेल पालवी संपादक म्हण काम पळयतात. तांचे दोन कविता संग्रह ‘अथ्रेक’ आनी ‘तूं’ हे उजवाडाक आयल्यात. आनीक दोन कविता संग्रह आनी एक कथा संग्रहाचेर काम चालू आसा. ‘भाड्याचो कुसवो’ ह्या तियात्राचें गोवा कोंकणी अकादेमी खातीर लिप्यांतर केलां. ‘मासे आणि मी’ ह्या स. गोपालकृष्ण भोबे हांच्या मराठी पुस्तकाचो साहित्य अकादेमी खातीर कोंकणींतल्यान ‘नुस्तें आनी हांव’ ह्या नांवान तांणी अणकार केला. ‘र. वि. पंडीत हांच्यो वेंचीक कविता’ हें साहित्य अकादेमी खातीर तांणी संपादीत केल्लें पुस्तक रोखडेंच उजवाडाक येवपाचें आसा.
फाटलीं साबार वर्सा ते कोंकणी म्हणी आनी वाक्प्रचार एकठांय करपा सांगाताक ताचेर संशोधन, संकलन करपाचो वावर करतात. म्हणी आनी वाक्प्रचार संकलनांचीं दोन पुस्तकां उजवाडाक येवपाचीं आसात. ‘सरस्वती वाचनमंदीर, पणजी, गोवा सॅक्युलर सॅल’, ‘रामानंद प्रकाशन, ‘कलामंथन’आमोणें, ‘कोंकण टायम्स’, ‘गोंय विद्यापीठ’, ‘कोंकणी सेवा केंद्र’ कुडचडें, ‘कोंकणी भाशा मंडळ’, गोवा कोंकणी अकादेमी हांचे पुरस्कार सखारामबाबांक फावो जाल्यात. अफाट वाचन हो तांचो छंद.
‘जिबेवेली जतनाय’ पुस्तकाक कृ. म. सुखठणकार आनी लेखक मुकेश थळी हांणी ब्लर्ब बरयलां. 200 पानांच्या पुस्तकाचें मोल 400 रु. जावन आसा. संजना पब्लिकेशनान पुस्तक प्रकाशन केलां. हांवें जेन्ना अमेरिकेंत आशिल्ल्या समिक्षक सखाराम शेणवी बोरकार हांकां फोन लावन ‘जिबेवेली जतनाय’ ह्या पुस्तका विशीं अभिप्राय विचारलो, तेन्ना तांणी सांगलें,
‘म्हणी ह्यो अणभवाच्यो खणी. म्हणी म्हणल्यार रासवळ समाजाचो हारसो. समाजाच्यो चालीरीती, अणभव ह्या म्हणींनी आसपावतात. एकट्या दुकट्याक आयिल्ले अणभव जेन्ना भौसाक येतात, काळाच्या कसवटणेर ते खरे थारतात तेन्नाच म्हणी घडटात. मागीर ते अणभव उतरांनी मांडप जाता. म्हणी मौखिक जाल्ल्यान ताचें यमक जुळवप जाता, जे वरवीं त्यो सहज भौसाच्या तोंडांत घोळटात. चडश्या म्हणीं फाटल्यान एक काणी आसता. म्हणीचो उपेग करतलो जाल्यार ताचो अर्थ सारको मतींत आसपाक जाय. तो कळटलो जाल्यार दरेके म्हणी फाटलो अणभव, घडणूक वा काणी समजून घेवंक जाय. ज्या अणभवांतल्यान वा जे घडणुकेंतल्यान म्हणीचो जल्म जालो तो अणभव वा ती घडणुक पुराय तरेन म्हणीच्या अर्थाचें आनी मर्माचें दर्शन आमकां घडयता. ह्या म्हणी फाटल्या काणयां उदेशीं त्या वेळच्या समाजाचें आनी चालीरितींचें आमकां दर्शन घडटा.’
असो हो मायेस्त लेखक पिरायेची सत्तरी हुपता. सखाराम बाब, तुमी सदांच आवयभाशे पासत जिवीत खर्चिलें. एक नवी सुरवात जावुंदी. आनीक वाडदीस येतले, जे तुमचे इतलेच अद्भुत आनी स्वास्थ्यवर्धक आसतले. हें वर्स बरी भलायकी, सुख आनी खोशयेन भरूं. वाडदिसाचीं परबीं तुमकां.
विशाल सिनाय खांडेपारकार
8080622370
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
