कोंकणीचें शिक्षण देवनागरी लिपिंतूच

भांगरभूंय | प्रतिनिधी

खाजगी प्रस्तावाचेर मुख्यमंत्र्यांचें स्पश्टीकरण

भाशेच्या आदाराचेर राजकारण करचें न्हय असो उलो

शिक्षणांत रोमी लिपीच्या थारावाचो प्रस्ताव भायरायलो

भांगरभूंय । प्रतिनिधी

पणजी : तज्ञांच्या अहवाला उपरांत कोंकणी शिक्षणा खातीर देवनागरी लिपी निश्चीत जाल्या. हातूंत आतां बदल जावचो ना. रोमी कोंकणीच्या मुद्या वयल्यान समाजांत फूट घालची न्हय. तशेंच भाशेच्या मुद्या वयल्यान राजकारण करचें न्हय, असो उलो मुख्यमंत्री डॉ. प्रमोद सावंत हांणी मारलो.

कोंकणी शिक्षणांत रोमी लिपीचो आस्पाव करचो, अशी मागणी करपी खासगी प्रस्ताव आमदार अ‍ॅड. कार्लोस फेरेरा हांणी सभाघरांत मांडलो. ह्या प्रस्तावाचेर नेटाची चर्चा जावन तो 24 आड 6 मतांनी भायर मारलो. रोमी कोंकणी खातीर सरकार दाल्गादो कोंकणी अकादमीक अनुदान दिता. दाल्गादो कोंकणी अकादमीन रोमी कोंकणींतल्यान शिकोवपाक हरकत ना. अर्थीक मजत दिवपाची सरकाराची तयारी आसा. मात शिक्षणीक माध्यमांत रोमी कोंकणीचो आस्पाव जावचो ना. कोंकणी शिक्षण देवनागरी लिपिंतल्यानूच जातलें, अशें मुख्ययमंत्र्यांनी स्पश्ट केलें.

रोमी कोंकणींतल्यान दर्जेदार साहित्याची निर्मिती जाता. अ‍ॅड. उदय भेंब्रे, दिलीप बोरकार हांणी लेगीत रोमी कोंकणींतल्यान साहित्य बरयलां. कर्नाटकान कन्नड लिपिंतल्यान कोंकणी बरयतात. खूब जाण रोमी कोंकणीचो वापर करतात. हाका लागून रोमी लिपीचो कोंकणी शिक्षणांत वापर करचो, अशी मागणी अ‍ॅड. कार्लोस फेरेरा हांणी केली.

विरोधी पक्ष फुडारी युरी आलेमांव, वेन्झी व्हिएगस, क्रूज सिल्वा हांणी लेगीत कोंकणी शिक्षणा खातीर रोमी लिपीचो पर्याय दिवपाची मागणी केली. देवनागरी लिपीक लागून खूबशे गोंयकार कोंकणी शिकपाक पळय नात. कोंकणींत तांकां उणें गूण मेळटात. देवनागरी वा रोमी हो पर्याय विद्यार्थ्यांक दिवचो, अशी मागणी क्रूज सिल्वा हांणी केली.

हो विशय भाशेचो वा माध्यमाचो ना. कोंकणी ही गोंयची राजभास आसा. सरकार लेगीत कोंकणींतल्यान चलपाक जाय. कांय विद्यार्थ्यांक देवनागरी लिपींतल्यान कोंकणी शिकपाक आडखळ येता. तांकां रोमी लिपीचो पर्याय दिवचो, अशी ही मागणी आसा, अशें विजय सरदेसाय हांणी सांगलें. कोंकणी शिक्षणा खातीर लिपीचो प्रस्न हो 1962 वर्साच सोंपला. झा आयोगान शिक्षणांत कोंकणी खातीर देवनागरी लिपी योग्य आशिल्ल्याचें स्पश्ट केलां. हाचे उपरांत 1981 वर्सा शिक्षणा विशींच्या सल्लागार मंडळान लेगीत कोंकणी खातीर देवनागरी लिपी निश्चीत केल्या. 2020 वर्सा राष्ट्रीय शिक्षण धोरण तयार जालें. हें धोरणाचे कार्यवाही खातीर सरकारान जी समिती स्थापन केल्ली, ते समितीन लेगीत कोंकणी खातीर देवनागरी लिपी निश्चीत केल्या. शिक्षणा खातीर देवनागरी लिपीचो निर्णय तज्ञांनी घेतिल्ल्यान हातूंत बदल जावप शक्य ना, अशें मुख्यमंत्री डॉ. प्रमोद सावंत हांणी स्पश्ट केलें.

साश्ट म्हालांत चड मुळाव्यो शाळां बंद जाल्यात

गोंयकारांनी पयलीं मराठी शाळांतल्यान मुळावें शिक्षण घेतलें. भाशावादा वेळार साश्ट म्हालांत इंग्लिशेंतल्यान मुळावें शिक्षण घेवपाक सुरवात जाली. हाका लागून साश्ट म्हालांत सगल्यांत चड मुळाव्यो शाळा बंद जाल्यो. उत्तर गोंयांत सत्तरी म्हालांत एकूच कोंकणी शाळा आसा. मराठी शाळा बंद पडूंक ना. कोंकणीच्या तुळेंत मराठी मुळाव्या शाळांक लोक प्राधान्य दितात, अशें मुख्यमंत्री डॉ. प्रमोद सावंत हांणी सांगलें.