भांगरभूंय | प्रतिनिधी
कोंकणी भाशा मंडळाचो सरकाराच्या निर्णयाक तेंको
भांगरभूंय | प्रतिनिधी
मडगांव : सरकारी नोकऱ्यां खातीर कोंकणी भाशेचें लिखीत गिन्यान सक्तीचें करपाचो जो निर्णय गोंय सरकारान घेतला ताका कोंकणी भाशा मंडळ आनी अखील भारतीय कोंकणी परिशद पुरायपणान तेंको दिता. सर्वोच्च न्यायालयाच्या निर्णया प्रमाण सरकारी नोकरी मेळचे खातीर घाल्ली राबितो दाखल्याची अट काडून उडयिल्ल्यान कोंकणी भाशेच्या गिन्यानाची सक्ती गरजेची जाल्या अशें मत कोंकणी भाशा मंडळाची अध्यक्ष रत्नमाला दिवकार हांणी उक्तायलां. मडगांवच्या कोंकणी भाशा मंडळाच्या सभाघरांत आयोजीत केल्ले पत्रकार परिशदेंत तांणी ही म्हायती दिली. ह्या वेळार अखील भारतीय कोंकणी परिशदेचे कार्याध्यक्ष चेतन आचार्य आनी पलाश अग्नी हजर आशिल्ले.
गोंय सरकारान नोकऱ्यां खातीर कोंकणी भाशेच्या गिन्यानाची सक्ती सदळ केल्यार महाराष्ट्र आनी हेर राज्यांतल्या सुमार 10 धा कोटीं जनता सरकारी नोकऱ्यां खातीर पात्र थारतली, हाचो विचार करून वयलो निर्णय आनिकूय प्रभावीपणान कसो लागू करप शक्य आसा ताचेर सरकारान लक्ष केंद्रीत करप गरजेचें आसा, अशें दिवकार हांणी सांगलें. मराठीभाशीक समर्थकांच्या चेपणाक बळी पडून सरकारान आपल्या धोरणांत बदल केल्यार गोंयांतल्या हजारांनी बेरोजगारांचेर ताचो परिणाम जातलो. अशा बदलाक भाशा मंडळ आनी कोंकणी परिशदेचो सक्त विरोध आसतलो. गरज पडल्यार अशा बदलांक विरोध करपा खातीर गोंयांतले जनतेक एकठांय करून आंदोलन उबारपा खातीर फाटीं सरचे नात, अशी शिटकावणी दिवकार आनी आचार्य हांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
