कोंकणीची क्रांती

भांगरभूंय | प्रतिनिधी

मानादिक उदयबाब,

नमस्कार, 

माफ करात. 17 मार्च, 2025 दिसा तुमी सकाळीं पणजे आयले नात, पूण आमी आदले मुख्यमंत्री मनोहर पर्रीकार हांच्या यादस्तिक थळार फुलां घालून आर्गां ओंपलीं. तुमी म्हाका नीत शिकयली, तुमी राजभास कोंकणी केली, आतां ती पोटा खातीर सक्तीची जातली. शाळा, म्हाविद्यालयांनी. सगल्यांच्या विरोधांतल्यान कोंकणी गेल्या. उदयबाब, भिवपाची गरज ना आमीं राजभास कायदो बदलूंक दिवचीं नात. मात्शें पिंपळा पेडार बसूया, ब्रह्मास्त्रां सोडूया. उदयबाब, तुमी गोंयचे मुखेलमंत्री जावपाचे लायकीचे.  

उदयबाब, रागार जावं नाकात, तुमी एक जीवनगौरवी व्यक्तीत्व, तुमी अर्धव्यू म्हज्या पयल्या ‘व्यक्तींत्वां शीमे पल्तडीं’ ह्या पुस्तकांतले. कोंकणीचे अर्धव्यू. अधर्व्यू म्हणल्यार ब्रह्मा ऋषी. तुमी जिणेचें होमखण केलें, कशें? ‘भांगरभूंय’ दिसाळ्यांत 2024 वर्सा छापून आयिल्लो म्हजो लेख तसो ल्हान, पूण इतिहास घडयतलो अशें म्हाका दिसूंक नाशिल्लें. हांव खूब ल्हान, पूण फुडारांत पळोवपाचें गिन्यान म्हाका तुमी दिलां. डोंट वरी उदयबाब, तुमकां जांच करतल्यांक आमी बंदखणीत धाडटलेच. कोलवाळे परस सड्यार धाडप बरें.

उदयबाब, ही चीट बरयतना म्हाका खूब खोस जाल्या, म्हजें पयलें पुस्तक जल्माक आयलें म्हुण. पयल्या पुस्तकाचो जल्म पयल्या भुरग्या वरी आसता. म्हज्या पुस्तकाचो जल्म जालो पूण हांवें जिलबी, दुदफेणे कोणाक वांटले नात, व्हडलो प्रकाशन सुवाळो करुन एक कप च्या, सामोशेय दिले नात. उदक आमी पिलीं, तान गेली.  75 व्या वर्सांच्या पत्रकार गुरुदास सावळ, सतीश नायक हांकां एक कप च्या दिलीना हाचें म्हाका वायट दिसलें. हवामान इतलें वेगीं बदलता, आंगांतल्यान घामाच्यो पावळ्यो मार्च मध्यान्हेक गळूंक लागल्यात. पुस्तकाचें प्रकाशन जाता ते दिसा सुर्या मळबांत तळपूंक आरंब जावचेआदींच आमीं घराय पावलीं.

उदयबाब, समेस्त गोंयकार म्हण्टात आमी इतीहास घडयलो? कसलो? आदले मुख्यमंत्री मनोहरबाब पर्रीकार हांच्या मिरामारच्या यादस्तिक थळार पुस्तक प्रकाशन केलें ताचो? मनोहरबाब, पुस्तकप्रेमी. गाडयेंत ड्रायव्हराच्या म्हऱ्यांतल्या आसनार बसून चलते गाडयेंत सकाळीं दिसाळीं वाचपी. हांवें एक दीस तें पळयल्लें. पुस्तकां वाचून हांवय व्हड जाल्लें, कित्याक कोण जाणा म्हाका पुस्तक तांकां ओंपचें दिसलें? वाचलें आसतलेंच तें तांणी! तांचो पुत उत्पल तांचेवरीच, हातांत पुस्तकाची प्रत दितकच तें वाचूंक ताणें आरंब केलो. मुख्यमंत्री डाॅ. प्रमोद सावंत, प्रदेश भाजपाध्यक्ष दामू नाईक हांणीय पुस्तकाचीं दोन पानां थंयच वाचलीं. जो पुस्तक वाचता तो वांटावता हें सत फुडारांत गोंयकारांक सांगतले ही आस्त हांव बाळगीतां.     

उदयबाब, तुमकां खबर आसा पुस्तक प्रकाशन मनोहर यादस्तिक थळार करपाक म्हाका मजत करपी दामूबाब  

हांणी हो इतिहास घडोवन हाडलो. खात्री आसा ते ‘शोर 27 न्ही शोर 32’ य करुंक शकतात. 

उदयबाब, तुमीं एक दीस मोबायलार उलयतना म्हाका मुख्यमंत्री डाॅ. सावंत कोंकणी बेस बरी उलयतात अशें सांगिल्लें. तांच्या उलोवपाचो अणभव हांवें राजभास दिसाचे कार्यावळींत देड म्हयन्यां आदीं घेतलो. कितें उलयले ते. तांच्या आंगांत शणैं गोंयबाब आशिल्लेवरी ते उलयले. तुमचें ‘यादींचो कुरपणो’ पुस्तक तांकां दिवचें अशें म्हाका तेन्नाच दिसलें. ‘शीमे पल्तडीं’ ह्या पुस्तक प्रकाशना वेळार कोणेंच उलोवप ना ही म्हजी मॅसेज गेल्ली. दोन उतरां पत्रकार सुभाष कृ. नाईक उलयले. म्हाका उलोवपाची विनवणी जाल्ली, पूण उलोवप ना, बरोवप उतरांनी, सादे सोपे भासेंतल्यान हो निश्चेव केल्लो. प्रकाशनाचे कार्यावळीक शंभर एक लोक आशिल्ले, आमदार, मंत्री ना. मुख्यमंत्री डाॅ.सावंत म्हणल्यार सरकारच. ते आयले म्हणजें मंत्रीमंडळच आयिल्लें अशें मानपाक हरकत ना. 

उदयबाब, तुमकां खबर आसा पुस्तक प्रकाशनच न्हय जाल्यार हेर कार्यावळीय दोन, तीन जातात. एसी सभाघरांनी. ताचो भलायकेचेर परिणाम जाता, उगते माचयेर जावपी सुवाळेय चडांत चड एका वराचे आसचे, अशी नेमावळ करची पडटली अशें म्हाका दिसता.

‘शिमे पल्तडीं’ पुस्तकाच्या प्रकाशनाच्या आदल्या दिसा रातीं णव वरांचेर आमच्यो शुभेच्छा म्हुण ज्ञानपीठकार दामोदर (भाई) मावजो हांची मॅसेज आयली. मन मात्शें निरशेलें तरी सकाळीं उठून मनांत एकूच सांगलें, खंयचेय परिस्थितींत कार्यावळ जावपाकच जाय, फाटीं सरप ना. आदले दिसा प्रदेश भाजपाध्यक्षांनी कार्यावळ जातलींच, टायमार उतर दिल्लें, विश्वास आशिल्लो. पर्रीकाराचो पूत अभिजीत आनी हांव यादस्तिक थळार पावलीं तेन्ना सकाळीं पावणेंणव जाल्लीं. कसलींच आडमेळीं नासतना आमीं पावलीं, हे खातीर पुलीस खात्याचे उपकार. हांव वळखना पूण पुलीस म्हाका वळखतात हें नदरेक आयलें. उमेदीन येवकार मेळ्ळो. पुस्तकाच्यो शंभर प्रती पोतयेंत आशिल्ल्यो. कदेलांर बसलें खरें, पूण पुस्तक प्रकाशीत करुंक मेळत, कोण आसतलो बराबरीन हाची कल्पना करूंक नाशिल्ली. सकाळीं सतीश नायक हांचे कडेन उलयतना गरज पडल्यार आमचे आमीच रस्त्याकुशीक रावन पुस्तकाची उजडावणी करपाची येवजण उक्तायिल्ली. तूं जायच अशें सुभाषाक कळयल्लें. 

सकाळीं णव वरां आदींच प्रदेश भाजपाध्यक्ष, मुख्यमंत्री आयले तेन्ना फाटले कांय दीस आशिल्ली थाकाय गेली. पत्रकार अवित बगळे  ते आदीं पाविल्लो, ताका एकूच सांगिल्लें, तूं आमच्या वांगडा आसतलो. अविताक म्हणलें, तूं आयलो, खूब तेंपान मेळ्ळीं, बरें दिसलें. सावळ आनी सतीश, प्रकाश वा. कामत, प्रो. प्रजल आनी अंजू साखरदांडे, शमा पै आयलीं, प्रकाशन कोणाचे हस्तुकीं हो प्रस्न विचारपी पत्रकार मयुरेश वाटवे आयलो. एक जाप ताका दिल्ली, गरज पडल्यार तुमी, आमी प्रकाशन करुया. मुख्यमंत्री, उत्पल पर्रीकार, दामूबाब आसतलेच. 

उदयबाब, मोन्यांनी पुस्तक प्रकाशन जालें कागदांत गुठलावंक नाशिल्ल्या पुस्तकांचें. साहित्यिक चंद्रकांतबाब केणी हांचे जांवय हर्षवर्धन भाटकुळी मिनीटभर उसरां पावले, मुख्यमंत्र्यांच्यो, अधिकाऱ्यांच्यो गाड्यो सुटल्यो तरी खोस भोगली. उत्पल पर्रीकार समेस्तां मदीं, हर्षवर्धनाची ताची वळख. मॅडम, पुस्तक दी, पुलिसांचेय हात फुडें आयले. पुस्तक इल्लेशें, मानवलें, परबी प्रुडंट, रकाद धाडपी.     

– सुहासिनी प्रभुगांवकार