कोंकणीक उंचायेर व्हरपाकसगळ्यांचो आदार जाय: मुकेश थळी

भांगरभूंय | प्रतिनिधी

1) खंयचोय साहित्य पुरस्कार मेळटकच, लेखक आतां आपली जबाबदारी वाडली अशें सांगता. तुमकां दिसना की लेखकाची जबाबदारी बरोवपाक सुरवात करता तेन्नाच्यान सुरू जाता?

• आदीं सावन ताची जबाबदारी आसताच. लेखक ना म्हुणना. पूण जेन्ना एक प्रतिश्टेची संस्था वा शासकिय यंत्रणा लेखकाच्या योगदानाची दखल घेता आनी पुरस्कार दिता तेन्ना ताची जबाबदारी वाडटा. ताका आपले लिखणेंत सातत्य दवरचें पडटा आनी दर्जोय सांबाळचो पडटा. लेखकान वाचकांक बरें बरें दीत रावचें अशें म्हाका दिसता.
  2) तुमी चडशे निबंद आनी व्यक्तीचित्रां बरयल्यांत, साहित्यांतले हेर प्रकार हाताळपाक दिसनात?
• निबंद म्हज्या साहित्य बरोवपांतलें बलस्थान. दरेकल्याक त्या त्या गजालींची आवड आसता. म्हजी अभिव्यक्त जावपाची आनी आवड म्हुणल्यार निबंद. ते खातीर हांव चड वेळ निबंदाक दितां.
  3) साहित्यीक बरें साहित्य केन्ना दिवंक शकता?
• म्हजो पिंड वैचारीक आशिल्ल्या कारणान हांव चड निबंदा वटेच्यान ओडला. म्हाका निबंद बरोवपाचेर पकड मेळ्ळ्या आनी हातूंतल्यान हांव म्हजे जिणेंतले अणभव, चिंतन बरे तरेन मांडपाक शकतां. निबंदांतले तंत्र जुळोवन लोकांक सकारात्मकता दिवपाचो म्हजो हावेस आसता आनी आवड आशिल्ल्या कारणान हांव तातूंत रमतां आनी लोकांक बरें दिवंक शकतां.
  4) तुमी नाटकांय बरयल्यांत आनी तांकां इनामांय फावो जाल्यांत. ते विशीं सांगशात?
• नाटक हें म्हाका आवडटा. हांव अंत्रुज म्हालांत ल्हानाचो व्हड जालों. आमच्या म्हालांतल्या कलाकारांनी नाटकांत खूब योगदान दिलां. ताचो प्रभाव आनी अभ्यास आशिल्लोच. आमचें नाटक वयर सरतलें जाल्यार ताका मौलीक स्वतंत्र संहिता दिवपाची गरज आसा. म्हजे परीन हांवें तशे यत्न केले आनी अणकारय केले. हातूंतल्यान आनंद आनी समाधान मेळटा. नाटक हो सगळ्यांत कठीण साहित्य प्रकार. कित्याक तर येसायो चलतना बदल जायत रावतात आनी तांचे मागणे प्रमाणें परत बरोवचें पडटा. सादरीकरणाचें मुल्य राखचें पडटा. हे खातीर खूब खूब आनंद मेळटा.
  5) तुमी सदांच आपल्या साहित्यीक मुळावणाचें स्रय रवीन्द्रबाब केळेकार हांकां दितात, ते विशीं सांगशात?
• म्हज्या आजोळा म्हणल्यार प्रियोळा म्हजें भुरगेंपण गेलां. हांव 10 वर्सां पिरायेचो आसतना बरयत रावलों. तेन्ना म्हाका म्हज्या घरच्यांनी रवीन्द्रबाब केळेकार हांच्या घराची वाट दाखयली. तेन्ना म्हाका तांचे कडल्यान मार्गदशन मेळ्ळें आनी हांव घडलों. तेन्नाच्यान म्हजी प्रगती सुरू जाली आनी हांवें फाटल्यान वळून पळयलेंच ना. रवीन्द्रबाबान म्हाका मार्गदर्शना बरोबर प्रेम दिलें आनी माया दिली. हांव उतरांनी हें सांगूक शकना, इतलो तांणी म्हाका घडयलो. तांकां म्हजेर विस्वास आशिल्लो. तांकां ज्ञानपिठ मेळिल्लो तेन्ना तांणी आपले मुलाखतींत चार लेखकांचीं नांवां घेतिल्लीं की आमी तांच्या प्रवाहांतल्यान घडले. म्हजे खातीर तोच व्हडलो पुरस्कार आशिल्लो. म्हाका तांचे कडल्यान प्रेरणा मेळ्ळी. शिकपाक मेळ्ळें. तांकांय निबंद बरोवपाक आवडटाले. घडये तांचो प्रभाव म्हजेर पडला आसुंयेता. म्हणी आनी ओपारी ह्यो आमच्या कोंकणी भाशेंतलो गिरेस्त गजाली. त्यो हांव म्हज्या बरपांतल्यान दिवपाचो यत्न करतां.
  5) कथा वा कादंबरी बी बरोवपाचे विचार आसात?
• कथा हांवें थोड्यो बरयल्यात. हांवें कादंबरी बरोवची अशी म्हज्या इश्टांची खूब इत्सा आसा. कादंबरीक एक व्हडलो कॅनवास लागता. कादंबरी तशी सोंपीय न्हय आनी कठीणय न्हय. जमून आयलें जाल्यार हांव बरयन
  6) तुमचे निबंद वाचतकच त्या फॉम्युलाचेर तुमची ‘पकड’ आसा अशें समजतना. हें येस मेळोवपाक तुमकां कितें करचें पडलें?
• म्हाका निबंदाचो मोग आसा. हांवें कांय गुजराती लेखकांचें निबंद वाचल्यात. वेगळ्या वेगळ्या भाशांतल्या लेखकांचे निबंद वाचल्यात. असो अभ्यास आनी रियाज केल्ल्यान ही पकड मेळ्ळी.
  7) नव्या लेखकांक तुमी कितें संदेश दितले?
• नव्या लेखकांनी खूब खूब वाचूंक जाय. पुस्तकांच वाच्चीं अशें न्हय तर सगळे तरेचें वाचन करचें. दिसाळींय वाचून म्हायती मेळटा. हे खातीर प्रामाणिकपणान आपलो वावर मुखार व्हरचो.
  8) कोंकणी साहित्याचो दर्जो वाडटा काय देंवता? देंवता जाल्यार तो कसो वाडोवं येता?
• हे विशीं म्हाका हुस्को जाता. नव्या लेखकांनी बरोवंक जाय आनी सातत्य दवरूंक जाय. चडांत चड लोक कोंकणी कडेन येवंक जाय. तांकां पयस वचूंक दिवंक जायना. सगळ्यांनी एकठांय येवन हो वावर मुखार व्हरपाची गरज आसा.
  9) कोंकणी भास उंचायेर व्हरपा खाती कितें पावलां मारूं येतात?
  -खूब गजाली करपाची गरज आसा आनी तें सगळ्यांनी समजून घेवंक जाय. वेगवेगळ्या विशयांची उतरावळ तयार करपाची गरज आसा. बऱ्या साहित्याची निर्मिती जावंक जाय. नाटकांत मौलीक संहिता येवंक जाय. बरीं गितां येवंक जाय.