भांगरभूंय | प्रतिनिधी
प्रकाशबाबान मुजरत म्हाका हें पुस्तक धाडलें. तें हांवें इल्लें इल्लें वाचपाक सुरवात केली. भारावन वचपा सारकें पुस्तक हें.
श्री गुरुचरित्र हो दत्तसंप्रदायांतलो पवित्र आनी लोकप्रिय ग्रंथ. ताका पांचवो वेद अशें मानतात. सरस्वती गंगाधर हांणी इ.स. 1480 च्या सुमाराक हो ग्रंथ रचलो. तातूंत श्रीनृसिंहसरस्वतींचें जिणे-चरित्र, उपदेश आनी दत्तभक्तां खातीर आचरण मार्ग दिला. भक्तीचो एक सशक्त स्रोत म्हणचो असो हो ग्रंथ.
हो ग्रंथ महाराष्ट्र, गोंय आनी हेर राज्यांनी भावीक भक्तिभावान वाचतात. तीन आनी सात दीस अशीं हाचीं पारायणां करतात. हो ग्रंथ ओवीबध्द आसा. कांय लेखकांनी ह्या ग्रंथाचें भावरुपांतर केलां.
कोंकणीत पयलेच खेप श्री गुरूचरित्र ग्रंथ आयला. ताचें भावरूपांतर नामनेचे साहित्यीक डॉ. प्रकाश वझरीकार हांणी केलां. प्रकाशबाबान हो ग्रंथ अणकारपा फाटल्यान कारण घडलें. काळजा दुयेंसाक लागून पिडीत आसतना एकदां बांबोळे गोमॅकॉंत तांचेर बायपास शस्त्रक्रिया जावपाची आशिल्ली. डॉ शिरीष बोरकार हांणी ती केली. उपरांत डॉ बोरकार व्हेंटिलेटर काडून जातकच पळोवपाक आयले तेन्ना हेर दोतोर वतकच प्रकाशान आपणाक लागीं आपोवन सांगलें, गुरूचरित्र कोंकणींत हाडपाचो सपन दृष्टांत आपणाक जाला. आपूण गडबडींत आशिल्लों आनी गुंगी वता आसतनाचे अवस्थेंत पेशंट एकेकदां असंबंदीत उलयतात अशेंय आपणाक दिसलें अशें डॉ बोरकार हाणी प्रस्तावनेंत बरयलां. पूण फुडले खेपे प्रकाशबाब तपासपाक आयलो तेन्ना आपणे ताका तूं तेन्ना कितें सांगतालो अशें विचारलें. तेन्ना प्रकाशान आपलो दृष्टांत परत सांगलो आनी आपणे गुरुचरित्रांचो अभ्यास सुरू केला अशें सांगलें. कोंकणी भावरुपांतर करपाक सुरवात करतां अशें प्रकाशान सांगलें अशें डॉ बोरकारान बरयलां.
ते उपरांत प्रकाशबाबान ह्या ग्रंथाचो अभ्यास सुरू केलो. गुरुचरित्राचे वेगळेवेगळे ग्रंथ अभ्यासले. स म्हयन्यां भितर हें काम कशें पूर्ण जालें हें आपणाक अजापांचें कशें दिसता अशें प्रकाशबाब म्हणटा. सुमार 300 पानांचें पुस्तक हें.
प्रकाशबाबान मुजरत म्हाका हें पुस्तक धाडलें. तें हांवें इल्लें इल्लें वाचपाक सुरवात केली. भारावन वचपा सारकें पुस्तक हें. प्रकाशबाबान भाशेचो प्रवाह रसाळ आनी म्होंवाळ दवरला. भक्तीरसाचें अमृत आसा तशें दवरलां. कोंकणींत कथा रुपांत वाचतना तें काळजाक भिडटा. हांवें मराठींतूय गुरुचरित्र वाचलां.
तिनूय देव बाळकां जातात त्या अध्यायांत ‘चुरचरून भूक लागल्या’ अशें वाक्य तांच्या तोंडांतल्यान आयलां. चुरचुरून हें क्रियाविशेशण सुंदरूच थीक कशें बसलां. तेंकणी हें उतर खूब खेपे आयलां. तें म्हाका आवडलें. नवें उतर. तेंको हाचे वेल्यान तेंकणी. अशी सादी पूण नीज कोंकणी उतरावळ आयिल्ल्यान ह्या भावरुपांतराक एक तेज आयलां. भक्तीन वाचपी गुंगून वता, मुखार मुखार वाचत वता.
प्रकाशबाबाचे आवय बापूय भावार्थी. आपल्या बाबाचे चमत्कारीक अणभव प्रकाशबाबान सुरवातीक सांगल्यात. तांचें घर सांखळे. सांखळे त्या काळांत पयलें दत्त मंदीर जाल्लें जें व्हडलें आशिल्लें. रामदास कामत गायक दत्तभक्त. सांखळेचो. रामदास कामतीचो बापूय पालखेचीं पेणीं म्हणटालो. रामदास कामतूय बापाय वांगडा म्हणटालो अशें प्रकाशबाबान बरयलां. देवळां, जागरये, जागेकार, विधी संस्कार कथा हांचो सामुहीक प्रभाव जनमानसाचेर पडटा तसो तो आपणाचेरूय पडलो अशें प्रकाशबाबान बरयलां. ही सासाय, ही पुण्याय आनी हें संचीत ताचे ठांय आशिल्ल्यान ताच्या हातांतल्यान श्री गुरूची ही सेवा घडली अशें म्हाका दिसता. कोंकणीचें आध्यात्मीक दालन प्रकाशबाबान गिरेस्त केलें म्हूण ताची तोखणाय करीत तितली थोडी.
ह्या ग्रंथाची रचना संवादात्मक शैलींत आसा. सिद्ध (श्रीनृसिंहसरस्वती) आनी नामधारक (सरस्वती गंगाधर) हांच्यांतले हे संवाद. 53 अध्याय आसात. ओवीसंख्या: सुमार 7491. श्री गुरुचरित्र हो दत्तसंप्रदायाचो मुखेल ग्रंथ आसून भक्तां खातीर मार्गदर्शक आसा. वारकऱ्यांक जशे ज्ञानेश्वरी आनी दासबोध प्रीय, तशेंच दत्तभक्तांक गुरुचरित्र पारायणा खातीर सामको लागींचो ग्रंथ. सामान्य मनशान ईश्वरप्राप्ती खातीर आचरण कशें दवरचें हाचें मार्गदर्शन ह्या ग्रंथांत आसा.
महाराष्ट्र, कर्नाटक व दक्षीण भारतांत दत्तसंप्रदायाचो प्रसार ह्या ग्रंथाक लागून जालो, अशें म्हणटात.
परंपरे प्रमाण हो ग्रंथ बरोवपाचो आदेश स्वता श्रीनृसिंहसरस्वतींनी दिल्लो अशें मानतात.
आपल्या ग्रंथांत प्रकाशबाबान गोंयांतल्या हेर दत्त मंदिरांतल्या मुर्तींचे फोटो दिल्यात. तुयें पेडणें, दिवचल, सोनारभाट लांटबार्से, दत्तवाडी म्हापशें, चिंचोळें ताळगांव, पणजी, तपोभूमी कुंडय, दत्तगुंफा – सांगें, दुर्गादत्त मुर्ती – माशेल हे फोटो आस्पावीत केल्यात. दत्त मंदीर सांखळे पालखे वेळार जीं पेणीं जातात, तातूंतली उतरांय जोडणेंत दिल्यात.
डॉ शिरीष बोरकार चौगुले कॉलेजांत अकरावी बारावेक 1979-81 म्हजो क्लासमेट. ताचें बोरयेचें कुटुंब दत्तभक्त. थंय मोटो माटोव घालून गुरुचरित्र वाचन सप्ताह जातात. एकदां मकरंदबुवा रामदासीचीं खणखणीत प्रवचनां आशिल्लीं तेन्ना हांव पाविल्लों. तें सात्वीक वातावरण ओडलायणें आशिल्लें. मडगांव, पणजेच्यान लोक आयिल्ले.
डॉ बोरकार म्हणटात- हो दैवी ग्रंथ कोंकणींतल्यान बरोवन जालो ही प्रकाशबाबाची पूर्वपुण्याय. हें सामकें खरें. कारण असलीं कामां जावपाक पुण्यायेचें गांठवल आपणा ठांय आसचें पडटा.
गोंयांत दत्तसंप्रदाय आसा. खूब लोक गुरुचरित्राचीं पारायणां करपी आसात. श्री नृसिंहवाडी, गाणगापूर हांगासर गुरुचरित्राचें वाचन, पारायणां करपी भावीक आसात. आतां दोन फेब्रुवारीक गुरुप्रतिपदा आसा. तेन्नाय दत्तमंदिरांनी वाचन, प्रार्थना जातली.
मनशा कडेन आज शांती सोडून सगलें आसा. गुरुचरित्र हो जिणेचे वाटे वयलो एक नांगर कसो. गुरुचरित्रांत प्रकाश आसा. सत्याचो प्रकाश आसा, तो प्रकाशान कोंकणींतल्यान आमचे मेरेन पावयला.
हातूंतल्यो काणयो रंजक आसा. उद्बोधक आसा. मार्गदर्शक आसा. कितल्याशाच दुबावांचें आनी प्रस्नांचें निरसन करपी आसा. कर्मबंधन, कुकर्माचे परिणाम, आयुश्याचें म्हत्व, सत्कर्म, परोपकार, दान, भक्ती, प्रार्थना, सेवा हांचें म्हत्व ह्या पवित्र ग्रंथांत सांगलां. उजू चलणुकेची वाट कशी चलची, विश्वास, प्रारब्ध, मुक्ती अशा कितल्याशाच विशयांची चिकित्सा ह्या ग्रंथांत सोंप्या उतरांनी केल्या. मनीस जल्म कित्याक मेळ्ळा, ताचें प्रयोजन कितें, हें बेस बऱ्या उतरांनी सांगलां. तें कळना जातकच जिणेचें तारूं भरकट्टा. भरकटलेंच जाल्यार तें योग्य दिशेन निटायेर हाडपाक जीपीएस एकूच- गुरूचरित्र ग्रंथ. प्रकाशबाब वझरीकाराचें ह्या महत्कार्या खातीर अभिनंदन.
मुकेश थळी
फाेंडें
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
