कोंकणींत नेमान दर्जेदार साहित्याची निर्मिती

भांगरभूंय | प्रतिनिधी

किशोर अर्जुन : ‘प्रकाशक – लेखक पुरस्कार’ फावो जालो

भांगरभूंय । खबरां मेज

पणजी : कोंकणींत नेमान दर्जेदार साहित्य निर्माण जाता. अनुवादाच्या निमतान हें साहित्य हेर भारतीय भाशांनी व्हरपाचो ‘सहित’चो सदांच यत्न आसता. कारण ह्या माध्यमांतल्यानूच कोंकणी साहित्याची आनी साहित्यकारांची वळख भारतीय वाचकांक जावपाक शकतली, अशें किशोर अर्जुन हांणी सांगलें.

अखील भारतीय मराठी प्रकाशक संघाचे वतीन जाहीर जाल्लो 2024 चो प्रकाशक – लेखक पुरस्कार किशोर अर्जुन हांकां पुणे जाल्ले जाहीर कार्यावळींत हालींच नामनेचे कलाकार योगेश सोमण हांचे हस्तुकीं भेटयलो. ह्या वेळार किशोर अर्जुन हांणी सांगलें.

ह्या वेळार मराठी साहित्य संमेलनाचे आदले अध्यक्ष, नामनेचे साहित्यीक भारत सासणे, प्रकाशक संघाचे अध्यक्ष राजेंद्र बर्वे, कार्यवाह पराग लोणकर, ज्येश्ठ प्रकाशक अशोक मुळ्ये, ज्येश्ठ फोटोग्राफर आनी प्रकाशक ल. म. कडू माचयेर हाजीर आशिल्ले.

‘क्वेशन मार्क’च्या अनुवादा खातीर मेळिल्लो प्रकाशक संघाचो हो पुरस्कार म्हणल्यार आमच्या ह्या सगल्या यत्नांक मेळिल्ली उर्बा आसा. हाचे मुखार लेगीत चडांत चड कोंकणी साहित्य मराठी सयत विवीध भारतीय भाशांनी व्हरपाचो यत्न ‘सहित’ करतलो, अशें किशोर अर्जुन हांणी पुरस्कारा संबंदांत आपली प्रतिक्रिया दिली. प्रकाशक संघाचे वतीन दर वर्सां विवीध साहित्य कृतीं खातीर प्रकाशकांक पुरस्कारांनी भोवमानीत करतात. तातूंत  प्रकाशक लेखक लेगीत आसात, तांचे साहित्यकृतीचे लेगीत विशेश भोवमान करतात. 2024 त सहीत प्रकाशना वतीन किशोर अर्जुन हांणी युवा नाटककार गौतम गावडे हांणी बरयिल्ल्या ‘क्वेशन मार्क’ ह्या कोंकणी नाटकाचो मराठी अनुवाद करून प्रकाशीत केल्लो. ह्या अनुवादीक संहिते खातीर प्रकाशक संघान जाहीर केल्लो प्रकाशक लेखक- पुरस्कार किशोर अर्जुन हांकां भेटयलो.