भांगरभूंय | प्रतिनिधी
राजभास संचालनालयाची पदां भरपा खातीर अधिसुचोवणी
पणजीः गोंयांत कोंकणी भाशेची उदरगत करपा खातीर गोंय राजभास संचालनालयान नवीं पावलां उबारल्यांत. कोंकणीची शब्दावळ तशेंच नवे शब्दकोश आनी उतरावळ तयार करपा खातीर भास संशोधक अधिकारी आनी भास संशोधक सहाय्यक हीं दोन नवीं पदां तयार केल्यांत. तशेंच दुर्मीळ जायत वचपी गांवगिऱ्या वाठारांतली कोंकणी भास पुर्नजिवीत करपाची जापसालदारकी ह्या अधिकाऱ्यांचेर आसतली अशी म्हायती गोंय राजभास संचालनालयान दिल्या.
राजभास संचालनालयान भास संशोधक अधिकारी आनी भास संशोधक सहाय्यक हीं दोन नवीं पदां तयार करून हे खातीर नोकर भरतीची जायरात उजवाडायल्या. हीं दोन पदां संचालनालयाच्या भास संशोधक विभागांत कार्यरत जातल्यो. इंग्लीश वा दुसरें खयचेंय भाशेंत कोंकणींत अणकार करतले जाल्यार शब्दावळीचो उणाव पडटालो. तशेंच कायदेशीर शब्दावळ कोंकणींत नाशिल्ली ही शब्दावळ तयार करपा सयत कोंकणींत शब्दकोश आनी उतरावळ भास संशोधक, भास संशोधन विभागांत तयार करतले.
राजभास संचालक प्रशांत शिरोडकार हांणी दिल्ले म्हायती प्रमाण संचालनालयान नवी दिल्ली शिक्षण मंत्रालया खाला गठीत केल्ले वैज्ञानीक आनी तांत्रीक शब्दावळी खातीरचे आयोग कडेन कबलात करून कोंकणी भाशे खातीर शब्दावळ तयार करतात. हो आयोग संचालनालयाच्या भास संशोधन विभागांत कोकणीच्या जाणकारां बरोबर कार्यशाळा घेवन ही शब्दावळ तयार करता आनी सरकारी अधिकाऱ्यांक प्रशिक्षण दिता. हे अधिकारी आयोगाचे मजतीन हेंच काम आतां फुडें व्हरतले.
कोंकणींत 350 परस चड विद्या फांट्याची शब्दावळ तयार करपाक जाय. तातूंतले आतां मेरेन शेतकी, जनावरशास्त्र, रसायन शास्त्र, संगणक आनी पर्यावरण अभ्यास, गणीत आनी मास कम्युनिकेशन तशेंच पत्रकारिता मळार शब्दावळ तयार जाल्या आनी उरिल्ल्या मळार शब्दावळ तयार करपाचें काम हे अधिकारी करतले, अशें प्रशांत शिरोडकार हांणी सांगलें.
भास संशोधन अधिकाऱ्याचें काम भाशेचो नियाळ घेवप, संपादन करप, डेटा एकठांय करून ताची तपासणी करप, शब्दावळ, शब्दकोश आनी उतरावळ तयार करपाचें आसतलें. जाल्यार भास संसोधक सहाय्यक मुळाव्या पावंड्यार वचून डेटा आनी म्हायती एकठांय करतले. तशेंच गरज पडल्यार हे अणकारय करतले. मुळाव्या पांवड्यार जी गांवगिऱ्या वाठारांत कोंकणीची बोलिभास आमचे जाण्टेले उलयताले ती लुप्त जायत वचपी कोंकणी पुनर्जिवीत करपा खातीर ते उलोवपी लोकां बरोबर मेळून ताची उतरावळ तयार करपाचें काम करतले, अशी म्हायती शिरोडकार हांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
