भांगरभूंय | प्रतिनिधी
एलिस्टर मिरांदः साहित्यीक सर्तीचीं भेटयलीं इनामां
भांगरभूंय । खबरां मेज
पणजीः कोंकणींतल्यान अस्मिताय सांबाळपाची गरज आसा. कोंकणी ना जाल्यार अस्मिताय आसची ना, अशें ओ हेराल्डो दिसाळ्याचे संपादक एलिस्टर मिरांदा हांणी सांगलें.
दाल्गादो कोंकणी अकादमीन अस्मिताय दीस व्हड उमेदीन मनयलो. जनमत कौला निमतान डॉ. जॅक सिकेरा हांचो उगडास दीस मनयलो. तशेंच साहित्यीक सर्तीचीं इनामां भेटयलीं. हो सुवाळो पणजेच्या दा. कों. अ. रेजिनाल्ड फर्मांडीस सभाघरांत आयोजीत केल्लो. ह्या सुवाळ्यांत मुखेल सोयरे म्हूण मिरांदा उलयताले. तांचे वांगडा दा. कों. अ.चे अध्यक्ष सेल्सो फर्नांडीस, उपाध्यक्ष विलियम्स फर्नांडीस, पा. मायरन जेसन बार्रेटो, भांडारी आफोन्सो ब्रागांझा हाजीर आशिल्ले.
जनमत कौलाची ज्या दिसाच्यान सुरवात जाली तेन्नाच्यान आमी अस्मिताय राखली. गोंयकारांची संस्कृताय हीच आमची वळख. तिका कोंकणी विणें संस्कृताय म्हणपाक जावची ना. जावं ती फेस्तां, परबो, मांडे, दुलपदां, जे जें गोंयांत आसा ताका कोंकणी लागू जाता. फाटलीं 8 वर्सां आमी अस्मिताय दीस उमेदीन मनयतात. आमचें गोंयकारपण आनी अस्मिताय नानपयत जायत जल्ल्या, ल्हवू ल्हवू अस्मिताय इबाडीत चल्ल्या. कांय वर्सांनी आमकां हो दीस घडये दिसचो ना, हो हुस्को सतायता. आमी सगळ्यांनी हातांत हात घालून, भुजाक भूज लावन आमची अस्मिताय सांबाळपाक जाय, अशें सांगून मिरांद हांणी जनमत कौलाची परबीं भेटयलीं.
पुरस्कार आनी इनामां मेळयिल्ल्या लेखकांनी फुडारांत कोंकणींतल्यान बरयतना काळजांतल्यान बरोवचें. पुरस्कार मेळटले म्हूण बरोवं नाकात. दुसऱ्यांक बरें दिसचें म्हूण बरोवं नाकात. तुमच्या काळजाक जें बरें दिसता तें बसयात. तातूंत आमचे संस्कृतायेचें आनी गोंयचें वर्णन आसचें. ओ हेराल्ड नेमाळ्यांत कोंकणी दायज पान येता. ताचे तुमी वांगडी जायात आनी तातूंत कोंकणींतल्यान बरयात. कोँकणीचो बावटो सदांच वयर उरूं. आमी चडांच चड कोंकणी उलोवया, तिची उदरगत करुया तशेंच कोंकणी आमची भास आनी आमी गोंयकार हाचो अभिमान बाळगात, असो उलो मिरांदा हांणी मारलो.
मिरांदा हस्तुकीं साहित्यीक सर्तींतल्या जैतिवंतांक इनामां भेटयलीं. सुरवेक मिरांदा हांणी फुलां ओंपून डॉ. जॅक सिकेरा हांकां आर्गां ओंपलीं. सेल्वो फर्नांडीस हांचेंय ह्या वेळार उलोवप जालें. सोनिया गोम्स हांणी सुत्रसंचालन केलें जाल्यार पा. मायरन जेसन बार्रेटो हांणी उपकार मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
