भांगरभूंय | प्रतिनिधी
फ्रँक फर्नांडीस, ग्रेफीन्स फर्नांडीस, पिमेंता लेगीत रिंगणांत
भांगरभूंय । प्रतिनिधी
मडगांवः बाणावले जिल्हो पंचायत पोट वेंचणुके खातीर वार्काचे फ्रँक फर्नांडीस, ग्रेफॅन्स फर्नांडीस, कॉँग्रेसची आदली पदाधिकारी रॉयला फर्नांडीस हांणी अर्ज सादर केल्यात. हाचे पयलीं इंडि आघाडीचे उमेदवार पिमेंता हांणी अर्ज भरला. बाणावले जिल्हो पंचायत पोटवेंचणूक आतां बरीच रंगतली. इंडि आघाडींतल्या पक्षान आम आदमी पक्षाचो उमेदवार पिमेंता हाका फाटबळ दिलां. मात आतां रॉयला फर्नांडीस हांणी काँग्रेस पक्ष सोडून अपक्ष म्हणून वेंचणूक अर्ज सादर केला. तशेंच वार्काच्या फ्रँक फर्नांडीस हांणी अपक्ष म्हणून अर्ज सादर केला.
बाणावलेच्या लोकांचो आवाज म्हणून ग्रेफॅन्स फर्नांडीस हांणी अर्ज सादर केला. तांचे वांगडा सरपंच झेविअर फर्नांडीस आनी नुस्तेमार पेले फर्नांडीस हाजीर आशिल्ले.
लोकांच्या फाटबळार, समाजीक कार्यकर्त्यांच्या आदारान ही वेंचणूक लडपाचो विचार केला, अशें ग्रेफॅन्स हांणी सांगलें.
गोवा फॉरवर्डचे वांगडी पेले फर्नांडीस हांणी सांगलें, हे वेंचणुकेंत पक्षा वतीन न्हय, जाल्यार अपक्ष उमेदवार उबो केला. पक्षा कडल्यान कांयच सुचवण्यो नाशिल्ल्याचें सांगून कितेंय सुचवण्यो आयल्यार ताचेर चर्चा करची अशें तांणी स्पश्ट केलें. रॉयला हांणी सांगलें, बाणावले जिल्हो पंचायत पोट वेंचणूक जावपाचें कारण म्हणल्यार जिल्हो पंचायत वांगड्यान जातीचें फटीचें प्रमाणपत्र दिल्लें. ताचेर हरकत घेवन आपणें याचिका दाखल केली आनी तो अपात्र थारला. जिल्हो पंचायत वेंचणूक हें पंचायतराज कायद्या प्रमाणा जाता आनी हातूंतय इंडि आघाडी कायम दवरली. बाणावले भाजप उमेदवार ना. अशें आसूनय कोणाक कुशीक काडपाचो यत्न जाता. कॉँग्रेसीचे गट समितीनूय दोन नांवां जिल्हो समितीक धाडली आनी तांणी प्रदेश समिती कडेन धाडली. मात कॉँग्रेसीन आघाडी वांगडा रावपाचो निर्णय घेतलो. ताका लागून काँग्रेस पक्ष सोडून अपक्ष वेंचणूक लडोवपाचो निर्णय घेतलो. आघाडी करतना थळाव्यांक विस्वासांत घेवंक ना आनी हे वेंचणुकेंत आघाडी करून गांवागांवा मदीं फूट घालची न्हय. हें राज्यभर जातलें अशी शिटकावणी रॉयला हांणी दिली. काँग्रेस पक्ष जरी सोडलो तरी पक्ष आपल्या मनांत आसा अशें तिणें म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
