भांगरभूंय | प्रतिनिधी
कॉंग्रेस, आपाचे आरोप भाजप, मगोन भायरायले
पणजी : फोंडें पोटवेंचणुकेच्या आव्हान याचिकेचेर उच्च न्यायालयांत बरेच दीस सुनावणी चलताली. सुनावणी चलता आसतना कॉंग्रेस वा आम आदमी पक्षान हस्तक्षेपाची याचिका कित्याक दाखल केली ना? तांचे उमेदवार वेंचणूक लडयताले. हाका लागून तांकां हस्तक्षेपाची याचिका दाखल करप शक्य आशिल्लें, अशें वीजमंत्री सुदीन ढवळीकार हांणी म्हणलां. वेंचणूक रद्द जावपा फाटल्यान भाजप सरकार आनी वेंचणूक आयोगाचे कारस्थान आशिल्ल्याचो आरोप तांणी भायरायलो.
फोंडा पोटवेंचणूक रद्द जावपाचो आदेश हो धक्को दिवपी आसलो तरी कायद्याचे नदरेन योग्य आसा. कॉंग्रेस पक्षाकडेन बरे वकील आसात. तांणी कायद्याचो योग्य तरेन अभ्यास करून हस्तक्षेपाची याचिका दाखल करपाक जाय आसली. भाजप हो सरकारांत आशिल्ल्यान तांकां हस्तक्षेपाची याचिका दाखल करप शक्य नाशिल्लें. रितेश नायक हो ३ हजार मतांनी फुडें आशिल्लो. भाजप – मगो उमेदवाराचें जैत निश्चीत आशिल्लें, अशें सुदिन ढवळीकार हांणी म्हणलां.
मिलीभगत आशिल्ली जाल्यार मुख्यमंत्र्यांनी ४० सभा कित्याक घेतल्यो? : सुभाष
फोंडें पोटवेंचणूक रद्द जावपाचो आदेश हें रितेश नायक हांचें बॅड लक आसा. तांचें जैत निश्चीत आशिल्लें. वावर करीत रावल्यार ताका फुडले खेपो येस मेळटलें. पोटवेंचणूक रद्द जावपा फाटल्यान मिली भगत आशिल्ली जाल्यार मुख्यमंत्री डॉ. सावंत हांणी प्रचारा खातीर ४० सभा कित्याक घेतल्यो? विरोधकांच्या आरोपांत खरेंपण ना, अशें उदका पुरवण मंत्री सुभाष शिरोडकार हांणी म्हणलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
