भांगरभूंय | प्रतिनिधी
भाजपानूच केलो आंबेडकरांचो खरो सन्मान
पणजीः कॉंग्रेसीन फकत बाबासाहेब आंबेडकरांच्या नांवाचो वापर केलो. मात फावो तशें स्थान तांकां दिवंक ना. भाजपान आंबेडकर हांचीं पांच स्मारकां बांदून खरो सन्मान दिला, अशें भाजपाची राष्ट्रीय सचीव अलका गुर्जर हांणी म्हणले.
बाबासाहेब आंबेडकर हांची जयंती मनवोपा खातीर दोन सप्तक भर भाजपान सन्मान अभियान हे कार्यावळीची म्हायती दिवपा खातीर घडोवन हाडिल्ले पत्रकार परिशदेंत अलका गुर्जर उलयताली. ह्या वेळार भाजप गोंय प्रदेशाध्यक्ष दामू नायक, भाजप सरचिटणीस नरेंद्र सावयकार आनी हेर फुडारी हजर आशिल्ले.
आंबेडकर एक दलीत फुडारीच नाशिल्ले. तर ते सगळ्या समाजाचे फुडारी तशेंच एक नामनेचे अर्थशास्त्री आनी कायद्याचे जाणकार आशिल्ले, अशें तिणें मुखार म्हणलें. स दसकां जालीं काँग्रेसीन सत्ता केली. पूण आंबेडकर हांकां संवसारांत आसतना आनी मरणा उपरांत चुकून पसून सन्मान दिवंकना. आंबेडकर हांकां हारोवपा खातीर पं. नेहरू हांणी व्हडलें षडयंत्र रचलें आनी तांचे योग्यते प्रमाण सन्मान आनी शासनांत काँग्रेसींत स्थान दिवंकना. काँग्रेसीन दलितांक फकत वोट बँक समजून आंबेडकरांचे विचार केन्नाच फुडें व्हरूंकना, असो गंभीर आरोप गुर्जर हांणी केलो.
विधानाच्यो प्रती घेवन ‘संविधान खतरे में है’ म्हणपी काँग्रेस समाजांत विख पातळायता. आंबेडकर हांकां भारत रत्न व्ही पी सिंह सरकार आसतना मेळ्ळें आनी त्या वेळार भारतीय जनता पार्टीन तांकां समर्थन दिलें. भाजपान आंबेडकर हांच्या जल्म थळार व्हडलें स्मारक उबारलें, ज्या थळार तांणी बौद्ध धर्म स्विकारिल्लो थंयसर भव्यय दिक्षा थळ उभारलें, तांणी शिक्षण घेतिल्लें लंडन शारांत तांची प्रतिमा उबारली. पूण काँग्रेशीच्या काळांत तांच्या स्मारका खातीर एक जमनीचो कुडको लेगीत मेळूंक ना, असो दावो गुर्जर हांणी केलो.
आंबेडकर जयंती निमतान गोंय धरून देशभर १३ ते २५ एप्रील हे दोन सप्तकभर कार्यावळी सुरू जातल्यो, अशें नरेंन्द्र सावयकार हांणी सांगलें.
१३ वेर गोंयभर आंबेडकराचे पुतळे नितळ करून मेणवाती लायतले. १४ वेर मुखेल कार्यावळीचो भाग म्हण संविधानाची प्रस्तावना वाचतले. पेडण्यां शासकीय कार्यावळ जाले उपरांत पणजे मुखेल कार्यावळ जातली. तातूंत मुख्यमंत्री सयत हेर मंत्री, आमदार हजर आसतले. उपरांत दरेक बुथांचेर भाजपाच्यो आंबेडकर जयंतीच्यो कार्यावळी जातल्यो, अशें सावयकार हांणी सांगलें.
हे कार्यावळीचो भाग म्हण जे दलीत समाजांतले, एससी समाजांतले व्हडल्या पदांचेर काम करतात तांचो कार्यकर्त्यां हस्तुकीं भोवमान जातलो. दलित आनी मागास समाजान भाजपा खातीर कितें काम केलां हाची म्हायती पावयतले. २१ एप्रिलाक मडगांव आनी २२ एप्रिलाक म्हापशें अश्या दोन सेमिनारांत विवीध मळार वावुरपी एससी समाजाचे तज्ञ संबोधन करतले, अशी म्हायती सावयकार हांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
