भांगरभूंय | प्रतिनिधी
मडगांव: कॉंग्रेस हो आमचे युतींतलो आमचे युतींतलो म्हत्वाचो घटक. कॉंग्रेसीची निर्णय प्रक्रियेची गती उणी जरी आसली तरी गोंयच्या राजकारण मात वेगान बदलता. गोवा फॉरवर्ड पक्षान कॉंग्रेसी मुखार कांय प्रस्ताव दवरतात; गोंयच्या हिता खातीर कॉंग्रेसीन ताचेर बेगोबेग निर्णय घेवन पावलां उखलचीं, असो उलो आमदार विजय सरदेसाय हांणी मारलो. फातोर्डा आयोजीत कार्नावल सुवाळ्याक ते उलयताले.
ह्या वेळार लंडनचे खासदार किथ वाझ, कॉंग्रेसीचे गोवा प्रभारी माणिकराव ठाकरे, प्रदेशाध्यक्ष अमित पाटकार, युवा कॉंग्रेस अध्यक्ष अर्चित नायक, दुर्गादास नायक आनी हेर मानेस्त हाजेर आशिल्लीं. सरदेसाय हांणी सगल्या सोयर्यांचो भोवमान केलो.
दर वर्सा कार्निवाल चड भव्य करपाचो आमचो यत्न आसता. गोंयची संस्कृती संरक्षीत करून ती फुडले पिळगे मेरेन पावोवप हें ध्येय आसा. म्हणूनच थळावें बँड आनी परंपरीक गोंयचे खावपाचे संस्कृतीक आमी प्राधान्य दिलें.
गोंयच्या तरणाट्यांच्या स्थलांतरा विशीं चिंता उक्तायतना सरदेसाय हांणी, जायते तरणाटे रोजगारा खातीर परदेशांत वतात. तांकां दोट्टी नागरिकत्वाचो हक्क मेळचे खातीर सरकारान यत्न करप गरजेचें. सध्याचें सरकार हातूंत अपेशी थारिल्ल्यान, जनतेन गोंयच्या खर्या अर्थान प्रतिनिधित्व करपी सरकाराक फाटबळ दिवचें. आमची युती सत्तेंत आयल्यार पुर्तुगेज पासपोर्ट आशिल्ल्यांक दोट्टी नागरिकत्व मेळोवन दिवपा खातीर आमी कटिबद्ध आसात. अंदूं गोंयच्या राजकारणांत ’मेक गोवा’ वा ’ब्रेक गोवा’ अशी स्थिती निर्माण जावपाक शकता. हाका लागून कॉंग्रेसीन अदीक वेळ घालयनासतना येवपी वेंचणुके खातीर सज्ज जावचें, असोय सल्लो तांणी दिलो.
मजगतीं, कॉंग्रेस प्रदेशाध्यक्ष अमित पाटकार हांणी आत्मविश्वासान सांगलें, गोंयांत कार्निवालाचे सुरवाते उपरांत पांच दीस किंग मोमोची राजवट आसता. मात, फुडल्या वर्सा कॉंग्रेस आनी गोवा फॉरवर्डचें सरकार सत्तेंत येतलें, तेन्ना फकत पांच दिसूच न्हय, जाल्यार वर्सभर गोंयकार उमेदीन रावपाक शकतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
