भांगरभूंय | प्रतिनिधी
डेहराडून, खबरां संस्था : कैलास पर्वताक भेट दिवपाची उमेद आशिल्ल्या भक्तां खातीर एक व्हडली खबर आसा. फुडल्या सप्तका सावन उत्तराखंडांतल्या पिथौरागढ जिल्ह्यांतल्या पोरण्या लिपुलेखचे दोंगुल्ले वेल्यान एमआय- १७ हेलिकॉप्टरा वरवीं कैलाश पर्वताचें दर्शन सुरू जातलें. हाची घोशणा दोन-तीन दिसांनी जावं येता. ह्या प्रवासाक ७५ हजार रुपया खर्च येतलो.
कैलास पर्वत चीनाच्या ताब्यांत आशिल्ल्या तिबेटांत आसा आनी चिनाची शीम व्ह्यू पॉयंटच्यान १० किमी अंतराचेर आसा. व्ह्यू पॉयंटची उंचाय १४ हजार फुटां परस चड आसा. ताका लागून ५५ वर्सां मेरेनच्या लोकांकूच प्रवास करवानगी आसतली. दरेका प्रवाशाक धारचुला (पिथौरागढपासून ११ किमी) हांगा वचून आपले भलायकेची तपासणी करची पडटली. हांगाच परमीट मेळटलें.
सकाळच्या ६ वरां सावन हॅलिकॉप्टरची उड्डाण सुरू जातली.
कुमाऊं मंडळ विकास निगम (KMVN) चे अधिकारी ललीत तिवारी हांच्या म्हणण्या प्रमाण, हेलिकॉप्टराची उड्डाण सकाळीं ६ वरां सावन सुरू जातली आनी सगळ्या भाविकांक दनपरां २ वरां मेरेन गुंजी गांवांत परत हाडटले.
हे भोंवडेची पॅकेज ४ दिसांची आसा. हे खातीर ७५ हजार रुपया दरेके व्यक्तीक खर्च करचे पडटले. हातूंत हॅलिकॉप्टर- जीपीचें भाडें, रावपाक हाॅटेल, जेवण, गरम उदक, दाट चादर- गादी अश्या जायत्या गजालींचो आसपाव आसा. राज्य वा केंद्र सरकार प्रवास भाड्यांत सवलत दिवपाक शकता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
