भांगरभूंय | प्रतिनिधी
खंडपिठाचो कोलवाळ बंदखण प्रशासनाक आदेश
भांगरभूंय । प्रतिनिधी
म्हापशें: कोलवाळ बंदखणींतल्या जखमी तशेंच हेर कैद्यांची भलायकी तपासणी करून अहवाल सादर करचो, असो आदेश मुंबय उच्च न्यायालयाच्या गोंय खंडपिठान बंदखण प्रशासनाक दिला. कारबोटकार- टारझन टोळी युद्धा उपरांत आमची सतावणूक चल्ल्या असो आरोप करून स अंडर ट्रायल कैद्यांनी बंदखण प्रशासना आड याचिका दाखल केल्या. हे याचिकेचेर बुधवारा सुनावणी जाली.
30 मेक बंदखणींत विजय कारबोटकार आनी टारझन पार्सेकार ह्या कैद्यांचे टोळये मदीं आकांताची मारामारी जाल्ली. हे फाटभुंयेर 31 मेक बंदखण म्हानिरिक्षक ओमवीर सिंग बिश्नोई हांणी पुलीस आनी आयआरबी कमांडो हांचे सयत बंदखणीचेर धाड घातिल्ली. कुर्बान शेख हाका सोडून आमकां याचिकादार कैद्यांक एकांतांत दवरले. ह्या वेळार म्हानिरिक्षकान तोंडांत पिस्तूल घुसोवन दबंगगिरी करून आमकां शारिरीक आनी मानसीक त्रास दिल्ल्याचो आरोप हे याचिकेंत केला.
ह्या कैद्यां मदीं समीर शेख, कुर्बान शेख, इस्मायल मुल्ला, सादीक बेल्लारी, मुस्तफा शेख आनी महमद शरीफ शेख हांचो आस्पाव आसा. याचिकेंत राज्य सरकार, गृह खात्याचे सचीव, पुलीस म्हासंचालक, बंदखण म्हानिरिक्षक, ओमवीर सिंग बिश्नोई (आयपीएस) आनी बंदखण अधिक्षक हांकां प्रतिवादी केल्यात.
सरकार प्रतिज्ञापत्र सादर करतलेः एजी
स मदल्या दोगां कैद्यांची वैजकी चांचणी जाल्या. तांचेर उपचार लेगीत जाल्यात. हेर चवगांक चांचणी करपाची आसत, उपचार जाय जाल्यार आमचे दोतोर तयार आसात. तांकां हे परसूय बरे उपचार जाय जाल्यार आमची तयारी आसा, अशें आमी खंडपिठाक सांगलां. मजगतीं, बंदखण प्रशासनान तांची सतावणू केल्ल्याचो आरोप कैद्यांनी केला. हे विशीं सगळ्या गजालींची चवकशी करून सरकार प्रतिज्ञापत्र सादर करतलें, अशी म्हायती अॅडव्होकेट जनरल देविदास पांगम हांणी ‘भांगरभूंय’क दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
