भांगरभूंय | प्रतिनिधी
जायते जाण नोकरी खातीर यत्न करतात, पूण सगळ्यांक यश मेळटात अशें ना. सरकारी नोकरी मेळप तर चमत्कार म्हणूंक जाय. आसूं. ताचेर आमी उलोवया नाका. कांय जाणांचो आपल्या अभ्यासाचेर विस्वास आसता, पूण कोण खात्री दिवपाक शकना. ताका लागून बरेच तरणाटे नागरी सेवेची परिक्षा दितात. आयएएस जाले काय तांकां सरकारी बंगलो मेळटा. हाता सकयल चाकरी करपाक नोकर मेळटात. पूण हें गोंयच्या विद्यार्थ्यां खातीर सपन कशें. तें पुराय करपाक गोंयकारांनी राज्या भायर वचून यत्न करचे पडटाले. हालींच्या दिसांनी गोंयांत हाचें मार्गदर्शन मेळपाक लागलां. पूण तें थारावीक सुवातांनी. कांय आॅनलायन वर्गूय आसात. पूण ताची फी सर्वसामान्य भुरग्याक परवडपाची ना. आतां केशव सेवा साधना हे संस्थेन बेतोडें- फोंडें वाठारांत दर आयतारा सांजवेळा चार ते स मेरेन वर्ग सुरू केल्यात. तेय बी मुफत.
पयले फावट हे वर्ग सुरू जाले, तेन्ना विद्यार्थी प्रवेश घेवपाक फाटींफुडें करपाक लागले. कारण नोंदणी म्हूण पांच हजार रुपया डिपोझीट म्हूण घेतात. जर ताची हाजेरी 80 टक्के भरली जाल्यारुच ते ताका परत दितात. जे वक्त वा जाणकार येतात ते शिकोवपाक मानधन घेनात. मागीर आयोजीत तांकां प्रवास खर्च म्हूण कांय रक्कम दितात. विद्यार्थ्यांचें बरें जावेचं म्हूण हे सगले यत्न करतात. कांय विद्यार्थी पास जावन गोंय सरकाराचे सेवेंत लागले खरे. मागीर मार्गदर्शन कित्याक घेवचें पडलें? तर हेर राज्यांनी आठवे सावन अशा परिक्षांचो विद्यार्थ्यांचो अणभव विद्यार्थ्यां कडेन आसता. आमच्यो चडश्यो परिक्षा गोंय मंडळाच्यो आशिल्ल्यान आमकां स्पर्धात्मक परिक्षांचो अणभव मेळना. बारावे उपरांतूच स्पर्धा परिक्षांचो अणभव येता.
एके कार्यावळींत एका पालकान सांगिल्लें म्हाका याद जाता, ताणें विचारलें, गांवगिऱ्या वाठारांतल्या विद्यार्थ्यांनी वचपाचें खंय? ताका जाप दितना हांवें सांगलें की, हाचेर एक उपाय आसा, तो म्हणल्यार गांवगिऱ्या वाठारांतल्या शिक्षकांनी प्रशिक्षण घेवपाचें आनी भुरग्यांक परवडपी फी घेवन तांकां शिकोवपाचें. अजून काय तशें जाल्लें दिसना. इतले मजगतीं केशव सेवा साधनाच्या बेतोडें केंद्राचे कार्यवाह लक्ष्मण बेहरे, दोतोर संतोष देसाय हांच्या उपक्रमाची बातमी वाचली. हांगा हे संस्थेचो वावर 1992 वर्सा सुरू जालो. शिक्षण, तशेंच खाशेल्या विद्यार्थ्यां खातीर शाळा, भलायकी मळार सुरू आसा. नागरी परिक्षा, गोंय नागरी सेवा परिक्षा, बँकेच्यो परिक्षा हाचे खातीर ते वर्ग घेतात. लश्करांत वचपा खातीर जी परिक्षा आसता, ताचें मार्गदर्शन लेगीत ते दितात. खरें तर अशा मार्गदर्शन वर्गाची गरज प्रत्येक तालुक्यांत आसा.
लश्करांत आमचे विद्यार्थी वचनात, हाचे फाटल्यान गैरसमज हें कारण आसूं येता. ताचें मार्गदर्शन करपी वर्ग नात, हेंय कारण आसूंक शकता. हालींसराक बँकांनी पावले काय थंय हिंदी उलयले बगर जायना, कित्याक थंय जे कर्मचारी आसतात, ते चडशे गोंया भायले आसतात. आसूं. वादग्रस्त विशयाचेर उलोवपाची ही सुवात न्हय. विद्यार्थ्यांक आयतारा जे मार्गदर्शन दिताले, तातूंत कुंदनलाल हेमंत भदुरिया, प्रिसीला द्रवीड, शिरगुरकर, संस्कृती आईर हांचो आसपाव आसा. ह्या वर्गांत मार्गदर्शन घेतिल्ल्या जायत्या जाणांक नोकरी मेळ्ळ्या. ताची तशी केंद्रा कडेन नोंद ना. कारण हें केंद्र कार्य करीत रावता, फळाची अपेक्षा धरिना. नाना सांगतात, आमची कोणा कडेन सर्त ना. हांगा नाशिल्लें तें आमी सुरू केलां. ते लेगीत फुकट. समाजा भितर जर सुदारणा जावंक जाय, जाल्यार असले उपक्र हातांत घेवपाची गरज आसा.
नाना आरएसएस गोंय मुखेली म्हूणय काम केलां. ह्या केशव साधना केंद्राचो उल्लेख रवींद्र गोळे हांणी आपल्या पुस्तकांत केला. दुर्बळ समाजांतल्या विद्यार्थ्यां खातीर केल्लें काम लेगीत उर्बा दिवपाक शकता. फक्त बेतोडें केंद्रानूच परिक्षेचें मार्गदर्शन केंद्र सुरू केलां. मडगाव, दिवचले ती सुविधा ना. सादारण जुलय म्हयन्यात ह्या केंद्रांत विद्यार्थी प्रवेश घेतात. तांचो नंबर आसा 98224 88911 आनी 98346 99816
प्रा रामदास केळकार
9822583275
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
