भांगरभूंय | प्रतिनिधी
लोकांक तिडक; उदका पुरवण आनी शिंपणावळ खात्यां मदीं समन्वयाचो उणाव
भांगरभूंय । प्रतिनिधी
वाळपयः अंजुणें धरणाच्या खारजाचें काम हातांत घेतिल्ल्यान केरी सत्तरी वाठारांत फाटल्या तीन दिसां सावन पियेवपाच्या उदकाचो उणाव जाला. ताका लागून थळाव्या लोकांनी तिडक उक्तायल्या. उदका पुरवण खातें आनी शिंपणावळ खातें हांचे मदीं समन्वय नाशिल्ल्यान पियेवपाच्या उदकाचो उणाव निर्माण जाला, अशें लोकांचें म्हणणें आसा.
सोमार मेरेन खारजाची दुरुस्ती शक्य नाशिल्ल्यान फुडल्या सप्तकां मेरेन उदकाचो उणाव जावपाची शक्यताय आसा. हाका लागून थळाव्या लोकां मदीं तिडकीचें ल्हार पातळ्ळां. पंचायतीन हे संबंदांत विशेश लक्ष दिवन स्वतंत्रपणान पियेवपाच्या उदकाची वेवस्था करपाचो यत्न केलो, मात ते फावोशे नाशिल्ले, अशें थळावे लोक म्हणटात. हे संबंदांत थळाव्या लोकप्रतिनिधीन विशेश लक्ष दिवचें, अशी तांणी मागणी केल्या.
अंजुणें धरण प्रकल्पांत पावसाळ्यांत उदकाचो सांठो केला. तो रोखडोच कृशी, बागायतींक दितले. ताका लागून खारजाची दुरुस्ती हातांत घेतल्या. ह्या खारजांतल्यान केरी वाठारांत आशिल्ल्या उदक शुद्धीकरण प्रकल्पाक उदकाची पुरवण करतात. मात दुरुस्तीचें काम हातांत घेतिल्ल्यान उदका पुरवण बंद केल्या. हाका लागून उदक शुद्धीकरण प्रकल्पाची यंत्रणा बंद पडल्या. हाचो परिणाम केरी वाठारांत पियेवपाच्या उदक पुरवणेचेर जाला.
थळावे पंचायतीन पियेवपाच्या उदकाचो उणाव निर्माण जाल्ल्यान व्हाळवाट न्हंयेचेर पंप बसोवन उदका पुरवण करपाचो यत्न केलो. पूण तो फावोसो नाशिल्ल्याचें स्पश्ट जालां.
मजगतीं, हे संबंदांत भौशीक उदका पुरवण खात्याच्या अधिकाऱ्यां कडेन संपर्क केलो तेन्ना तांणी सांगलें, खारजाची दुरुस्ती हातांत घेवचे आदीं शिंपणावळ खात्याच्या अधिकाऱ्यांनी हे संबंदांत सुचोवणी दिवप गरजेची आशिल्ली. मात अचकीत ही दुरुस्ती हातांत घेतिल्ल्यान उदका शुद्धीकरण प्रकल्पाक उदकाची पुरवण जायना. ताका लागून पियेवपाच्या उदकाची पुरवण करप शक्य ना. शिंपणावळ खात्याच्या अधिकाऱ्यांनी हे संबंदांतली आगाऊ सुचोवणी दिल्ली जाल्यार हे संबंदांत पर्यायी वेवस्था करप शक्य जावपाचें. फाटल्या तीन दिसां सावन ह्या वाठारां गंभीर स्थिती उप्रासल्या, अशें अधिकाऱ्यांनी स्पश्ट केलें.
अधिकाऱ्यांच्या घाळपणाक लागून उदकाचो उणावः सरपंच
शिंपणावळ खात्यान खारजांतलें उदक बंद करचे आदीं हे संबंदांतली सुचोवणी उदका पुरवण खात्याक वा पंचायतीक दिवपाची गरज आशिल्ली. मात त्या अधिकाऱ्यांनी घाळपणा केल्ल्यान पियेवपाच्या उदकाचो उणाव निर्माण जाला, अशें हे संबंदांत प्रतिनिधी कडेन उलयतना केरीची सरपंच दीक्षा गांवस हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
