केरी-सत्तरी बेकायदो दोन टन बीफ धरलें
भांगरभूंय | प्रतिनिधी
जागृत तरणाट्यांची कारवाय; पुलिसांनी वाहन घेतलें ताब्यांत
वाळपय: बेळगांव वाठारांतल्यान गोंयांत येवपी बिफाची तस्करी दिसानदीस वाडूंक लागल्या. दोन दिसां पयलीं 400 कील बीफ बजरंग दलाच्या कार्यकर्त्यांनी सांपळो रचून धरिल्लें. दोगांक अटकूय केल्ली. बिफाची येरादारी करपी पिकपूय पुलिसांनी ताब्यां घेतिल्ली. सोमारा सांजवेळा परतून एकदां केरी सत्तरी वाठारांतल्या जागरूक तरणाट्यांनी सुमार दोन टन बेकायदो बीफ धरलें. हाका लागून ह्या वाठारांतल्यान बिफाची येरादारी व्हड प्रमाणांत जाता हें दिसून आयलां.
बेळगांव वाठारांतल्यान बिफाची येरादारी जावपाची आसा अशी म्हायती केरी वाठारांतल्या तरणाट्यांक मेळिल्ली. फाटल्या दोन दिसां सावन केरी वाठारांतले कांय तरणाटे पाळो दवरून आशिल्ले. सोमारा दनपारां सुमार दोन टन बीफ घेवन येवपी वाहन तांचे नदरेन पडलें. केरी तपासणी नाक्यार पावचे पयलींच तें वाहन तरणाट्यांनी आडायलें आनी पळोवणी केली तेन्ना तातूंत व्हड प्रमाणांत बीफ आशिल्ल्याचें दिसून आयलें.
हे विशींची म्हायती थळाव्या पुलिसांक दिले उपरांत तांणी रोखडीच घडणूक थळार धांव घेवन तें वाहन आपल्या ताब्यांत घेतलें. गाडयेचो पंचनामो करून बिफाची पशूवैजकी अधिकाऱ्यां वतीन तपासणी केली.
गाडयेचीं कायदेशीर कागदपत्रां नाशिल्लीं. हाका लागून हें बीफ पुरायपणान बेकायदेशीर आशिल्ल्याचें स्पश्ट जालें. हे विशीं थळाव्या नागरिकांनी अजाप उक्तायलां. इतल्या व्हड प्रमाणांत बिफाची बेकायदेशीर जावपी येरादारी ही धक्को दिवपी गजाल आसा.
मेळिल्ले म्हायती प्रमाण हें बीफ मडगांवां व्हरतालें. हाची कबुली गाडयेच्या ड्रायव्हरान दिली. अदीक म्हायती दिवपाक ड्रायव्हरान न्हयकार दिलो. मजगतीं, पुलिसांनी गाडी ताब्यांत घेतल्या. हे विशींचो गुन्यांव दाखल केला. फुडलो तपास पुलीस करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
