भांगरभूंय | प्रतिनिधी
पेडणें: केरी- पेडण्यां दर्यादेग वाठारांत पर्यटन खात्यान थळाव्या बेरोजगार तरणाट्यांक शॅक वेवसाय सुरू करपा खातीर परवाने दिल्ले. मात जंय थळाव्यांक शॅक वेवसाया खातीर सुवात निश्चीत केल्ली ताचे कुशीकूच व्हडा प्रमाणांत बेकायदेशीर शॅक वेवसाय आनी लाकडाच्यो खांटी घालून अतिक्रमणाचो यत्न जालो. हे खातीर विलास आरोलकार हे न्यायालयांत गेल्ले. उपरांत न्यायालयान बेकायदेशीर अतिक्रमण करप्यांचेर कारवाय करपाचो आदेश दिलो. तशेंच शॅक वेवसाया खातीरचे जे परवाने पर्यटन खात्यान थळाव्यांक दिल्ले तांचे खातीर कसलेच तरेचें अतिक्रमण करचें न्हय अशी सुचवणी केली.
थळावो वेवसायीक विलास आरोलकार हांकां शॅक वेवसाय सुरू करपा खातीर परवानगी दिल्ली. एके वटेन शॅक सुरू जालो जाल्यार दुसरे वटेन शॅका मुखार अतिक्रमण करून लाकडाच्यो खाटी घालून बेकायदो वेवसाय सुरू करपाचो कांय जाणांनी यत्न केल्ल्यान आरोलकार हांणी तिडक उक्तायली.
पर्यटन हंगामांत सरकार आनी पर्यटन खातें दरेका दर्यादेग वाठारांत बेरोजगार तरणाट्यांक, थळाव्यांक प्राधान्य दिवपा खातीर पर्यटन खातें वेवसाय सुरू करपा खातीर परवानगी दीत आसता. हेच फाटभूंयेर कांय दर्यादेग वाठारांनी सरकारी सुवातेरूय अतिक्रमण करून व्हडा प्रमाणांत बेकायदो शॅक वेवसाय करतात. हे शॅक वेवसाय कायदेशीर करतना लाखांनी रुपया सरकाराक महसूल म्हणून विवीध तरेचो टॅक्स भरचो पडटा.
मात जे कोण शॅक वेवसायीक हे वेवसाय बेकायदेशीर करतात तांकां कसलेच तरेची परवानगी लागना. तशेंच वेवसाय टॅक्सूय भरचो पडना. हाका लागून कायदेशीर वेवसाय करप्यांक व्हड आडखळी आयिल्ल्यान मान्यताय मेळिल्ले वेवसायीक तिडक उक्तायतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
