भांगरभूंय | प्रतिनिधी
पेडणें: सेल्फीचे धुंदींत केरी आजोबा दर्यादेगे वाठारांत बार्देसांतले चार जाण बुडिल्ले. तातूंतल्या दोगांच्यो कुडी आयतारा मेळिल्ल्यो जाल्यार उरिल्ल्यो दोन कुडी सोमारा मेळ्ळ्यो. तातूंतली एक कूड सकाळीं बुडिल्ले सुवातेचेरूच जाल्यार दुसरी कूड तेरेखोल किल्ल्या लागसार सांपडली.
म्हापशें आनी कांदोळेंच्या कांय तरणाट्यांचो पंगड आपल्या घरच्यां सयत पिकनीक करपाक 23 एप्रीलाक दर्यादेग वाठारांत आयिल्ले. तातूंतली सकीना खातून (18), बाकी अली (24) मोहम्मद अलीम अख्तर (18) आनी मोहम्मद येसीन (14) हे सेल्फी काडटना ल्हारा वांगडा दर्यांत व्हावून गेल्ले. एकेच सुवातेर एकाच वांगडा चार जाणांक बुडून मरण येवपाची ही पेडणें म्हालांतल्या दर्यादेगे वयली पयलीच दुर्दैवी घडणूक. ते जे सुवातेर रावून सेल्फी काडटाले थंय ‘डेंजर झोन’ म्हूण तकटोय लायिल्लो आसा. तरीय ते थंय खडपाचेर उबे रावून सेल्फी काडटाले. नेटान आयिल्ल्या ल्हारा वांगडा तीं चारूय भुरगीं दर्यांत व्हांवून गेलीं. तांकां वाटावपा खातीर तांचे मदलो आसीफ हाणें दर्यांत उडी मारली. मात तो खडपाचेर आपटून किरकोळ जखमी जालो. ताचेर गौमॅकाँत उपचार चालू आसात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
