भांगरभूंय | प्रतिनिधी
पणजी: शिक्षण आनी आत्मविस्वासाच्या बळग्यार मनशाची जैता कडेन वचपाची वाट सोंपी जाता. आपली मोख गांठपाची जिद्द विद्यार्थ्यांच्या मनांत निर्माण जातकच तांकां आडखळी आड झुजपाक बळगें आपसूक मेळत रावता अशें कारखाने आनी बॉयलर निरिक्षक तशेंच हायस्कुलाचे आदले विद्यार्थी संजय नायक हांणी सांगलें.
ते केरी फोंडेंच्या सुरश्री केसरबाय केरकार हायस्कुलाच्या विद्यार्थ्यांच्या वर्सुकी भोवमान सुवाळ्यांत मुखेल सोयरे ह्या नात्यान उलयताले.
अंदूं वर्सा केरी फोंडेंच्या सुरश्री केसरबाय केरकार हायस्कुलान सेगीत णववे खेपे गोंय शालांत मंडळाचे धावेचे परिक्षेंत 100 टक्के निकाल लायलाे. ते फाटभुंयेर जैतिवंत विद्यार्थ्यांचो भोवमान खाशेले कार्यावळींतल्यान केलो. कार्यावळीक हायस्कुलाचे आदले विद्यार्थी तशेंच साळगांवकार मायन्साचे निवृत्त मुखेल यांत्रीक अभियंते शैलेश केरकार हे खाशेले सोयरे म्हूण हाजीर आशिल्ले.
सेंत्रो एदुकादोर संस्थेचे अध्यक्ष संजय प्रियोळकार, हायस्कुलाचे अध्यक्ष जगन्नाथ केरकार, संस्थेचे वांगडी गिरीश गोब्रे, पालक शिक्षक संघाचे अध्यक्ष प्रकाश गाड केरकार, उद्देजक संदीप निगळये बी मानेस्त हाजीर आशिल्ले.
कार्यावळीचे सुरवेक शिक्षिका प्राविरा साखरदांडे हांणी येवकाराचें उलोवप करून मुखेल सोयऱ्यांची वळख करून दिली. मुख्याध्यापिका उषा बाळा नायक हांणी वर्सुकी नियाळ सादर केलो.
हायस्कुलांत 95 टक्के गूण मेळोवन पयलें आयिल्ल्या श्रिया संतोष केरकार ह्या विद्यार्थिनी सयत वळेरीन दुसरी आनी तिसरी सुवात मेळोवपी आर्या केरकार, साईश गावडे आनी हेर गुणेस्त विद्यार्थ्यांचो मुखेल सोयऱ्यांचे हस्तुकीं भोवमान केलो.
कार्यावळीचें सुत्रसंचालन शोभा प्रियोळकार हांणी केलें. जाल्यार शिक्षिका कल्पा जल्मी हांणी उपकार मानून पसायदानान कार्यावळ सोंपयली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
