भांगरभूंय | प्रतिनिधी
पेडणें: केरी- तेरेखोल वाठारांतल्या फेरयेच्या धक्यार आयोजीत कार्यावळींत सैमीक तरेन नुस्तें उत्पादन वाडीचो प्रकल्प सुरू केलो. ह्या वेळार स्पीड बोटींतल्यान खोल दर्यांत वचून, खासा तरेचे सिमेंट ब्लॉक्स उदकांत उडोवन येवजणेक सुरवात केली.
सैमीक तरेन नुस्त्याचें उत्पादन करतना नव्या तंत्रज्ञानाचो वापर करून उत्पादन वाडोवपाची केंद्र सरकारची येवजण आसा. ४ कोटी २ लाख खर्चुन ही येवजण पेडणें ते कोकणा मेरेन राबयतले. हे येवजणेचो खूब फायदो नुस्तेंमार भावांक जातलो, अशें नुस्तेमारी मंत्री नीळकंठ हळर्णकार हांणी सांगलें.
ह्या वेळार मंत्री हळर्णकर हांचे सयत आमदार जीत आरोलकार, सरपंच नागोजी, अनुपमा मयेंकार, सुलक्षा तळकार, दर्शन आनी हेर हजर आशिल्ले.
येवजणे खाला गोंयांत नुस्त्याचें उत्पादन वाडोवपा खातीर खासा येवजण राबयल्या. मांद्रेंच्या केरी आनी हरमल अशा दोन वाठारांनी ही येवजण सुरू करतले. ती केरी वाठारांतल्या नुस्तेंमार भावांक उपेगी थारतली, अशें तांणी फुडें सांगलें.
नुस्तेंमार संचालक ईल्लावन, सहसंचालक, केरीचे सरपंच धरती नागोजी, हरमलची सरपंच अनुपमा मयेंकार, पंच सांतान फर्नांडीस, केरीचे पंच अजय गाड, दर्शना जुलू, सुलक्षा तळकार, गुदिन्हो हजर आशिल्ले.
नुस्तेंमारी भावां खातीर केरी फिश रॅम्प, मोरजे मार्केट आनी फिशिंग रॅम्प येवजण मंजूर केल्ले खातीर मंत्री हळर्णकार हांचे आमदार आरोलकार हांणी उपकार मानले. केंद्रीय येवजणेचें सादरीकरण हरमला नुस्तेंमार भावां खातीर केल्लें. येवपी काळांत जायत्या प्रकल्पांचो बुन्यादी फातर उबारतले, अशें आरोलकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
