भांगरभूंय | प्रतिनिधी
7 लाखांची रोख रक्कम, भांगरा वस्ती फारायल्यो, एका दुबाविताक अटक
भांगरभूंय I प्रतिनिधी
वाळपयः केरी सत्तरींतल्या स्टेट बँक ऑफ इंडियाच्या (एसबीआय) फांट्यांत दरोडो घालपाची घडणूक घडली. मोट्या प्रमाणांत रोख रक्कम आनी भांगराच्यो वस्ती चोरट्यांनी फारायल्यो. वाळपय आनी दिवचल पुलीस अधिकारी चोरांचो सोद घेतात. अजून मेरेन कोणाकूच अटक जावंक ना.
मजगतीं, ह्या प्रकरणाचो तपास करपाक फांटो वेवस्थापक अानी बँकेच्या कॅशियर कर्मचाऱ्याक चवकशे खातीर पुलिसांनी ताब्यांत घेतल्या.
बँक वेवस्थापकाचें अपहरण करून चोरट्यांनी दरोडो घालपाचो यत्न केल्ल्याची म्हायती मेळ्ळ्या. रातीं उसरां उत्तर प्रदेशांतल्या एका दुबाविताक फोंडेंच्यान ताब्यांत घेतल्या. दुसऱ्या दुबाविताचो सोद पुलीस घेतात.
हे विशींची म्हायती काल सकाळीं 10 वराच्या सुमाराक उक्ताडार आयले उपरांत खवदळ पडलो. मोट्या प्रमाणांत खातेधारक बँकेच्या वाठारांत एकठांय जाल्ले. काल दीसभर बँकेचो फांटो बंद आशिल्लो. तशेंच पुलीस बंदोबस्त अाशिल्लो.
सकाळीं 7 वरांचेर कॅशराक सांखळे आपयलो
बुधवारा सकाळीं 7 वराच्या सुमाराक बँक वेवस्थापकान बँकेंत काम करपी कॅशियराक आपणाक बँकेंतली म्हत्वाचीं कागदपत्रां जाय, अशें सांगून ताका चावी दिवपाक आपयलो. ते प्रमाण बँक कॅशियरान सांखळे वचून तांकां बँकेची चावी दिली.
चावयो घेवन बँक वेवस्थापका सयत दुबावितांनी केरी हांगाच्या बँकेचे मुखेल दार उगडले. तशेंच बँकेंतली सुमार 7 लाखांची रोख रक्कम आनी भांगराच्यो वस्ती घेवन सगले जाण पणजेचे दिशेन पळ्ळे. तशेंच बँक वेवस्थापक दुबावितांनी पोरणें गोंया सोडलो.
उपरांत सकाळीं 9.30 वरांचेर बँक वेवस्थापकान हे विशींची कागाळ पणजी पुलीस स्टेशनांत केली. ते उपरांत तपास सुरू जालो.
मजगतीं, म्हायती मेळ्ळे उपरांत बँकेचे पणजेचे वरिश्ठ अधिकारी केरी बँक फांट्यांत दाखल जाले. मात पुलीस तपास सुरू आशिल्ल्यान तांकां भितर वचपाक मेळ्ळे ना. पूण बँक फांट्यांतल्या सीसीटीव्ही फुटेज मेळ्ळे उपरांत दरोड्यांत कितल्या जाणांचो आस्पाव आशिल्लो हे स्पश्ट जातलें.
बँक वेवस्थापकाचें अपहरण करून दरोडो
ह्या बँकेंत वेवस्थापकाचें काम करपी अधिकारी मंगळारा सांजे बँक बंद करून आपल्या दुचाकी वयल्यान पणजी घरा वतालो. आमोणेंत एका मोडणाचेर एका मोटारीन तांकां आडायले आनी बंदुकीचो धाक दाखोवन जबरदस्तीन मोटारींत बसयले. हे मोटारींत चार जाण अाशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
