भांगरभूंय | प्रतिनिधी
33 लाखांचें लुकसाण; माळराना वयल्या उज्यान मारलो घात
भांगरभूंय । प्रतिनिधी
काणकोणः केरी आगोंदा श्यामराव देसाय हांचे ऑर्कीड बागायतीच्या पॉली हावसाक उजो लागून पॉली हावसाचो गोबर जालो. 4 हजार चौखण मिटर सुवातेंत आशिल्ल्या ह्या पॉली हावसाक शेनवारा सांजे वेळार उजो लागलो.
4 हजार चौखण मिटर पॉली हावसांतलें फक्त 250 चौखण मिटर वाठारांतलें पॉली हावस वाटावपाक उजो पालोवपी दळाक येस मेळ्ळें. ह्या उज्यांत सुमार 33 लाख रुपयांचें लुकसाण जाल्ल्याचो अदमास पॉली हावसाचो धनी श्यामराव देसाय हांणी उक्तायला.
माळरानार लागिल्लो उजो देसाय हांच्या पॉली हावसा मेरेन पावलो. थंय आशिल्ल्या सुक्या तणान पेट घेतलो आनी ताका लागून पॉली हावसाक उजो लागलो. पॉली हावसांतल्या ऑर्कीड फुलांचें पीक घेवचे खातीर घातिल्ले बॅज, भितरली उदकाची पायपलायन, उदकाचो पंप, ऑर्किडाचे रोपे लासून गेले.
2016त देसाय हांणी बँकेचें रीण घेवन ऑर्कीड पॉली हावस सुरू केल्लें. ह्या पॉली हावसा खातीर गोंय सरकाराचें तशेंच केंद्र सरकाराचें अनुदान मेळटा. प्रकल्प पुराय जालो मात अनुदान मेळपाक 3 वर्सां लागलीं. ताका लागून सुरवेकूच 55 लाखांच्या ह्या प्रकल्पाचेर 18 टक्के व्याजा प्रमाण बँकेचें रीण वाडलें. तातूंत 2019त कोरोना म्हामारी आयले उपरांत फुलांचो वेवसाय बंद जाल्ल्यान बागायतींत फुलिल्लीं फुलां काडून भायर उडोवचीं पडलीं. त्या वेळार सुमार 5 ते 6 लाख रुपयांचें लुकसाण जालें. ते उपरांत तौकते वादळाक लागून पॉली शीट वाऱ्यान हुबून गेलें. तातूंत लेगीत लुकसाण जालें. शेतकी खात्या कडेन लुकसाण भरपाये खातीर अर्ज केलो, पूण ती अजून मेळूंक ना. तरी लेगीत ह्या वेवसायांतल्यान आयज वयर सरतलों, फाल्यां वयर सरतलों, अशी आशा बाळगून नोकरेंतल्या स्वइत्सेन निवृत्ती घेतिल्ल्यान मेळिल्लें लाखांनी रुपया मोडून पॉली हावसाचे हप्ते आनी रीण फारीक केलें. आतां चवथे खेपे उजो लागून पुराय सपन आनी इत्सा काबार जाली, अशें देसाय हांणी सांगलें. मेळिल्ले म्हायती प्रमाण गोंयांत वट्ट 42 जाणांनी पॉली हावस घातिल्ले. तातूंतले सुमार 7 पॉली हावस अजून चालू आसात, जाल्यार हेरांनी पॉली हावस मोडून कावलाक विकले. जाल्यार कांय जाणांचे पॉली हावस बांदिनासतनाच कंत्राटदारान लाखांनी रुपया घेवन पळ काडला. रीण फारीक करचे खातीर बँके कडल्यान शेतकारांक एकसारके पत्रां येत आसात. ताका लागून खूबशे शेतकार बँकेचे कटकटीक विटल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
