भांगरभूंय | प्रतिनिधी
भांगरभूंय । प्रतिनिधी
वाळपयः केरी हांगच्या बायलांनी नगरगांव पंचायत वाठारांत धावें-आंबेडें हांगा सुरू केल्ल्या अनाथाश्रमांत वचून भाऊबीज केली. अनाथाश्रमांतल्या दादल्यांक ओवाळून तांणी तांका मिठाय खावपाक दिली. आश्रमांत सुमार वीस जाण आसात. समाजांतल्या वेगवेगळ्या घटकां कडल्यान आश्रमाक मजत मेळटा. केरीचो पंच वांगडी राजेश गांवस हाच्या फुडाकारान बायलांनी थंय वचून भाऊबीज मनयली.
घोटेली 2चो पंच वांगडी राजेश गांवस हाची घरकान्न सोनिया गांवस, निशा गांवस, रतिका गांवस, गौरीशा गांव, रेणू गांवस, रेश्मा गांवस, आशा गांवस आनी ल्हान चलयांनी अनाथाश्रमांतल्या जाण्ट्यां वांगडा भाऊबीज मनयली तांणी तांच्या तोंडार हांशें हाडलें. गरीब, दुयेंती आनी जाण्ट्यांची सेवा म्हणल्यार देवाची सेवा आसता. अनाथाश्रमांतल्या जाण्टेल्यां वांगडा थोडे खीण रावन तांकां आमी जें समाधान दिवपाक शकलीं ती खोस वेगळीच आशिल्ली अशें सोनिया गांवस हिणे सांगलें.
केरी वाठारांतल्या समविचारी बायलो एकठांय येवन सामाजीक उपक्रम हातांत घेतता. अनाथाश्रमांत वचून थंय आशिल्ल्यांक मजत करप हो ताचोच एक वांटो आशिल्लो अशें निशा गांवस हिणे सांगलें. फुडाराक अश्याच वावरांतल्यान समाज सेवा करपाचो विचार आसा अशें तिणे सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
