भांगरभूंय | प्रतिनिधी
तिरुवनंतपूरम, खबरां संस्थाः केरळ विधानसभा अधिवेशनांत अमीबिक मेनिंजिओएन्सेफलायटिस (Amoebic Meningoencephalitis) ह्या घातक मेंदवाच्या संसर्गाचेर चर्चा जावपाची आशिल्ली, पूण विरोधकांनी अधिवेशनाचेर बहिश्कार घालो. ह्या वेळार दुयेंतींचो आनी मरण आयिल्ल्यांचो आंकडो लिपोवन दवरून संसर्ग नियंत्रीत करपा खातीर प्रभावी उपाय करूंक नाशिल्ल्याचो आरोप सरकाराचेर केलो.
युनायटेड डेमोक्रॅटिक फ्रंटाचे (UDF) आमदार एन. शमसुद्दीन हांणी स्थगीत प्रस्ताव सादर करतना सांगलें, “भलायकी मंत्री आनी खात्यान हाचें आदीं खोटे आंकडे दिल्ले आनी आतां परतून त्योच गजाली घडत आसात. फकत तळ्यांत न्हावनच न्हय तर घरांत न्हाणूनय लोकांक मरण आयलां.
विरोधी पक्षाचे फुडारी व्ही.डी. सतीसन हांणी सरकाराचेर खर टिका करतना विचारलें, विशय अमीबीक मेनिंजिओएन्सेफलायटिसचो आसतना भलायकी मंत्री 10 वर्सां पयलींच्या गजालीं विशीं कित्याक उलयता? हो संसर्ग पयलेच खेपे 2016त राज्यांत दिसून आयल्लो. आनी फाटलीं साडे णव वर्सां सावन हें सरकार सत्तेर आसा.
ह्या दुयेंसाचेर उपचार करपा खातीर ठोस मार्गदर्शक तत्वां नात, आनी जनजागृताय करपा खातीरय स्पश्ट निर्देश दिनात अशें सतीसन हांणी सांगलें.
16 सप्टेंबराक अपडेट केल्ल्या इंटिग्रेटेड डिसीज सर्व्हेलन्स प्रोग्रॅमाच्या (IDSP)आंकडेवारी प्रमाण केरळांत अंदूं 71अमीबिक मेनिंजिओएन्सेफलायटिसचे दुयेंती मेळ्ळ्यात, तातूंत 19 जाणांक मरण आयलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
