केरळ जातलें ‘केरळम’

भांगरभूंय | प्रतिनिधी

भांगरभूंय खबरां संस्था
केरळचे मुख्यमंत्री पिनाराई विजयन हांणी बुधवारा विधानसभेंत राज्याचें नांव बदलपाचो थाराव मांडलो. राज्याचें ‘केरळ’ हें नांव बदलून ‘केरळम’ करपाचो उल्लेख ह्या प्रस्तावांत आसा. सभाघरांत नेम 118 खाला थाराव सादर केला. जातूंत केंद्र सरकारा कडेन मागणी केल्या, भारतीय संविधानांत आठवे अनुसूचींत उल्लेख केल्ल्या सगळ्या भासांनी आमच्या राज्याचें अधिकृत नांव बदलून ‘केरळम’ करचें, अशें म्हणलां. विधानसभेंत प्रस्ताव मंजूर जाल्या उपरांत आतां हो प्रस्ताव केंद्र सरकारा कडेन धाडला.

देखून नांव बदल्लां

मुख्यमंत्री विजयन हांणी 1 नोव्हेंबर 1956 वर्सा भासांच्या आधाराचेर राज्यांची निर्मिती करपाचो उल्लेख केला. मल्याळम भाशेंत राज्याचें नांव ‘केरळम’ अशें जाय अशेंय तांणी म्हणलां. पूण संविधानाच्या पयले अनुसूचींत राज्याच्या नांवाचो उल्लेख ‘केरळ’ असो केल्ल्याचें सांगून तांणी नांव बदलपा फाटलें कारण सांगलें.
विधानसभेचे संमतीन केंद्र सरकारा कडेन संविधानांतले अनुच्छेद 3 खाला राज्याच्या नांवांत बदल करपाची मागणी करतात. बेगीनूच हे विशीं पावलां उखलचीं, अशीं आमी मागणी करतात.
सगळ्या भाशांनी राज्याचें नांव ’केरळम’ अशें करचें. राज्याचें नांव मल्याळमांत ‘केरळम’ अशें आसा. पूण हेर भासांनी ताका आतां केरळूच म्हणटा. राष्ट्रीय स्वातंत्र्य संग्रामाच्या काळा सावन मल्याळम भाशेंतल्या समुदायान एकवट दाखोवन केरळ राज्यांची स्थापना करपा खातीर यत्न सुरू करून हें राज्य स्थापन करपाक कितें म्हत्व आसा हें वळखल्लें अशेंय तांणी म्हणलें.

सगळ्यांनी दिलो हयकार; परत दिसून आयलो एकवट

केरळचे विधानसभेंत हो थाराव मुख्यमंत्र्यांनी मांडलो तेन्ना ताका सगळ्यांची संमती मेळ्ळी. खंयच्याच राजकीय पक्षान हाका विरोध करूंक ना. काँग्रेसीच्या फुडारपणा खाला युनायटेड डोमोक्रेटीक फ्रंटान हे विशीं कसलेच तरेचो बदल करपाची मागणी करूंक ना. ह्या निमतान परत एक फावट राज्याच्या प्रस्ना विशीं केंद्राकडेन कसलेच तरेचो प्रस्ताव मांडटना राजकी विरोध कुशीक दवरून केरळांत राजकी पक्ष एकठांत आयिल्ल्याचें चित्र पळोवपाक मेळ्ळें.