भांगरभूंय | प्रतिनिधी
कोची, खबरां संस्था ः केरळ आनी आखातांतल्या 6 देशां मदीं दर्या मार्गान प्रवास करप शक्य जातलें. केरळ मेरिटायम बोर्डा प्रमाण फुडल्या स म्हयन्यांत प्रवासी सेवा सुरू जावंक शकता. आतां मेरेन 6 मुखेल कंपनींनी ह्या मार्गाचेर बोट चलोवपा खातीर मसुदो धाडला. 22 एप्रील मेरेन हो मसुदो निमाणो जातलो.
मंडळाचे अध्यक्ष एन. एस. पिल्लईच्या म्हणण्या प्रमाण बोटीचो प्रवास विमान भाड्याच्या सुमार एक तृतीयांश इतलो आसतलो. तशेंच प्रवाशांक 75 किलो लगेज फुकट व्हरपाक मेळटलें. हंगामांत आखाती देशांतल्यान केरळ मेरेन 70 ते 80 हजार रुपया विमान भाडें आसता.
जाल्यार बोटीचें भाडें 25 हजार रुपया आसतलें. बहरीन, कुवेत, ओमान, कतार, साउदी अरेबिया आनी संयुक्त अरब अमीरात (युएई) ह्या 6 आखाती देशांतल्यान केरळा मेरेनचो हो दर्या प्रवास तीन ते चार दिसांनी पुराय जातलो. सुरवेक केरळांतल्या कोचीन बंदर आनी कोझीकोडांतल्या बेपूर बंदराचेर ही बोट सुविधा उपलब्ध आसतली. मंडळाच्या म्हणण्या प्रमाण बोट कंपन्यांक म्हालाची येरादारी करपाक मेळटली.
एक वर्सा खातीर बंदर शुल्कांत सवलत
हे बोटींतल्या सेवाक लागून केरळ तशेंच देशाच्या हेर वाठारांनी रावपी लोकांकय फायदो जातलो. केरळांतल्या कोचीन आनी बेपूर ह्या बंदरांवयल्यान ल्हान बोटींतल्यान प्रवासी विझिंजाम, कोल्लम आनी अज्जीकल शारांत वचूंक शकतात. थंयच्यान देशाच्या हेर वाठारांनी रस्तो, रेल्वे आनी हवाई संपर्क आसा. ह्या मार्गाक चालना दिवपा खातीर कोचीन पोर्ट अथॉरिटीन एक वर्सा खातीर बंदर शुल्कांत सवलत दिवपाची घोशणा केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
