भांगरभूंय | प्रतिनिधी
केरळ भलायकी मंत्र्यान दिल्यो म्हत्वाच्यो सुचवण्यो
कोझीकोड, खबरां संस्था: केरळांतल्या मल्लपुरम जिल्ह्यांत निपा व्हायरस जाल्ल्या १४ वर्सां पिरायेच्या भुरग्याक कोझीकोडांतल्या सरकारी वैजकी म्हाविद्यालयांत मरण आयलां. हाचे उपरांत केरळांतल्या भलायकी वेवस्थेक खबर दिल्या आनी केरळ भलायकी मंत्री विणा जॉर्ज हांणी म्हत्वाच्यो सुचोवण्यो जारी केल्यात. निपाह व्हायरसाक लागून मरण आयिल्ल्या त्या नेण्ट्या भुरग्याक १० दीस जोर आयिल्लो. शुक्रारा (१९ जुलय) ताका आयसीयूंत व्हेंटिलेटरांत दवरलो अशी म्हायती भलायकी खात्यान दिल्या.
मरण आयिल्ल्या भुरग्याचे चांचणेचे नमुने पुण्यांतल्या नॅशनल इन्स्टिट्यूट ऑफ व्हायरोलॉजींत धाडले. भुरग्याक निपा व्हायरसाची लागण जाल्या अशें एजन्सी कडल्यान सांगले उपरांत ताका कोझीकोडांतल्या सरकारी हॉस्पिटलांत धाडलो. भुरग्याचेर उपचार करपाखातीर लागपी मोनोक्लोनल अँटीबॉडीज हें वखद पुणे सावन कोझीकोडा धाडलें. पूण ताचे आदींच उल्लेख केल्ले दुयेंतीक मरण आयलें. आतां निपा व्हायरसाच्या मार्गदर्शक सुचवण्यां प्रमाण मरण आयिल्ल्याचे कुडीचेर निमणे संस्कार करतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
