भांगरभूंय | प्रतिनिधी
तिरुवनंतपुरम, खबरां संस्था: कांय दिसां आदीं हरियाणाच्या हिस्सार हांगा २६ वर्सां पिरायेच्या दादल्याक मंकीपॉक्साची लागण जाल्ली. आतां केरळांतूय ३८ वर्सां पिरायेच्या एका मनशाक मंकीपॉक्साची लागण जाल्या. ह्या मनशाचेर केरळांतल्या मलप्पुरम हांगच्या खाजगी हॉस्पिटलांत उपचार सुरू आसात. केरळ भलायकी खात्यान हे संबंदी म्हायती दिल्या. भारतांत मंकीपॉक्साची लागण लागपाची ही दुसरी केस.
इंडिया टुडेच्या अहवाला प्रमाण फाटल्या सप्तकांत ह्या मनशान युएईंतल्यान केरळांत प्रवेश केल्लो. पूण कांय वरां भितर ताका जोर आयलो. तशेंच ताच्या आंगाचेर चिकन पॉक्सा वरीं फोड दिसले. उपरांत ताका हॉस्पिटलांत दाखल केलो. ताची चांचणी जाली. बुधवारा चांचणेचो अहवाल आयलो. तातूंत संबंदीत मनशाक मंकी पॉक्साची लागण जाल्या हें स्पश्ट जालें.
हे विशीं केरळची भलायकी मंत्री वीणा जॉर्ज हांणी राज्यांतल्या नागरिकांक काळजी घेवची म्हणून उलो मारलो. नागरिकांक मंकीपॉक्साचीं खंयचींय लक्षणां दिसून आयल्यार, हाका भियेनासतना रोखडेंच हॉस्पिटलांत वचून उपचार घेवचे. तशेंच ज्या देशांत मंकीपॉक्सची प्रकरणां दिसून आयल्यांत त्या देशांतल्यान येवपी विमानांतल्या प्रवाशांचेर लक्ष दवरपाचे निर्देश अधिकार्यांकदिले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
