भांगरभूंय | प्रतिनिधी
तिरुअनंतपुरम, खबरां संस्था: केरळांतल्या सरकारी शाळांनी ‘बॅकबेंचर’ ही संकल्पना रोखडीच इतिहास जमा जावपाची आसा. शाळांनी लायनींत बसपाची परंपरीक पद्दत सोंपोवची केरळ सरकार तयार आसा. ‘बॅकबेंचर’ ह्या उतराचो विद्यार्थ्यांच्या आत्मविस्वासाचेर आनी शिक्षणीक उदरगतीचेर वायट परिणाम जाता अशें सांगून राज्य सरकारान हो निर्णय घेतला.
शिक्षणमंत्री व्ही. शिवनकुट्टी हांणी मंगळारा फेसबुक पोस्टा वरवीं ही म्हायती दिली. तांणी सांगलें, दरेका विद्यार्थ्याक शिक्षकांच्या संपर्कांत रावपाक मेळचें आनी शिक्षण प्रक्रियेंत समान आसपाव मेळचो हो ह्या निर्णयाचो हेतू आसा अशें तांणी सांगलें.
शिक्षण वेवस्थेंतूय बदल करपाची गरज
आयज संवसार नेटान बदलत आसा. त्या बदलां वांगडाच भौशीक शिक्षण वेवस्थेंतूय बदल करपाची गरज आसा, अशें मंत्री शिवनकुट्टी हांणी स्पश्ट केलें. फुडें उलयतना तांणी म्हणलें, आयज लेगीत जायत्या वर्गांनी अशी परिस्थिती आसा की शिक्षक बोर्डाचेर शिकयता तेन्ना फाटल्यान बसपी विद्यार्थ्यांक स्पश्टपणान दिसना वा आयकूंक येना. हाका लागून तांकां व्हड लुकसाण जाता.
खाशेली समिती नेमपाचो निर्णय
ही सुदारणा प्रभावीपणान चालीक लावपा खातीर राज्य सरकारान तज्ञांची समिती नेमपाचो निर्णय घेतला. विद्यार्थ्यां खातीर खंयची बसपाची वेवस्था चड प्रभावी थारतली हाचो अभ्यास समिती करतली.
चित्रपटांतल्यान प्रेरणा घेतली
’स्थानार्थी श्रीकुट्टन’ ह्या मलयाळम चित्रपटाक लागून ही संकल्पना चालीक लागली. विनेश विश्वनाथन हाणें दिग्दर्शीत केल्लो हो चित्रपट फाटल्यान बसून एका विद्यार्थ्याक अपमान जाल्ल्याचो अणभव आनी ताणें सुचयल्ल्या बसपाची वेवस्था सुदारपा विशीं आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
