भांगरभूंय | प्रतिनिधी
कोची, खबरां संस्था ः केरळांतल्या भाजपाच्या ओबीसी फुडाऱ्याच्या खून प्रकरणांत 15 आरोपींक मरणाची ख्यास्त फर्मायल्या. सगले आरोपी बंदी घाल्ल्या ‘पोपुलर फ्रंट ऑफ इंडिया’ (पीएफआय) संघटनेचे वांगडी आशिल्ले. शेनवारा न्यायालयान ह्या 15 जाणांचेर आरोपपत्र दाखल केल्लें. ते उपरांत आयज मावेलिक्कर जिल्लो न्यायालयान तांका मरणाची ख्यास्त फर्मायली. 2021 वर्सा भाजपा फुडारी रंजीत श्रीनिवासन हांची हत्या जाल्ली.
मेळिल्ले म्हायती प्रमाण ह्या खून प्रकरणांत आठ आरोपी आशिल्ले. जाल्यार हेर आरोपींनी ह्या गुन्यांवांतल्या मुखेल आरोपींक मजत केल्ली. केरळांतल्या भाजपाच्या ओबीसी विभागाचो फुडारी रंजीत श्रीनिवासन हांची 19 डिसेंबर 2021 दिसा तांच्या घरांत क्रूरपणान हत्या जाली. अलाप्पुझा हांगाच्या तांच्या घरांत ताच्या कुटुंबा मुखार आरोपीनी रंजीताक जिवेंशी मारलो.
पीएफआय संघटनेचेर 2022 वर्सा बंदी घाल्ली. अजमल, अनुप, मोहम्मद अस्लम, अब्दुल कलाम उर्फ सलाम, सफरुद्दीन, मन्शद जसीब राजा, नवाज, समीर, नझीर, अब्दुल कलाम, झाकिर हुसैन, शाजी, नैसम आनी शेरनास अश्रफ ह्या 15 आरोपांक जिल्लो न्यायालयान मरणाची ख्यास्त फर्मायल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
