भांगरभूंय | प्रतिनिधी
कोची, खबरां संस्था : केरळांतल्या कोझीकोड ग्रामीण पुलिसांनी तीन पाकिस्तानी नागरिकांक दीर्घकाळ व्हिसा खातीर अर्ज केल्ल्याचें कळिल्ल्यान देश सोडपाची नोटीस फाटी घेतल्या. पहलगाम आतंकवादी हल्ल्याक जाप दितना राजनैतिक, अधिकृत आनी दीर्घकाळ व्हिसा आशिल्ले पाकिस्तानी सोडून हेरांक 29 एप्रील मेरेन भारत सोडपाक सांगला.
24 एप्रीलाक सरकारान जाहीर केलें की सार्क व्हिसा आशिल्ल्या पाकिस्तानी नागरिकांनी 26 एप्रील मेरेन भारत सोडचो आनी वैजकी व्हिसा आशिल्ल्यांक 29 एप्रील मेरेन. अल्पकाळा खातीर भारतांत आयिल्ल्या 12 वर्गांतल्या पाकिस्तानी लोकांची मुजत आयतारा सोंपली.
पुथानपुरावलप्पिल हमसा (79), खामरुन्नीसा आनी तिची भयण असमा ह्या तिगांय पाकिस्तानी नागरिकांक फाटल्या सप्तकांत पुलिसां कडल्यान नोटिशी आयिल्ल्यो. तीं बरोच तेंप कोझीकोडांत रावतात.
हमसाचो जल्म केरळांत जालो आनी तो 1965 वर्सा कोलकाता सावन एका नोकरी दिवपी एजंटा वरवीं उदेंत पाकिस्तानांत (सद्याचो बांगलादेश) पावलो. उपरांत तो कराचीक पावलो आनी थंय आपल्या भावा वांगडा रावतालो. 2007 वर्सा परतून केरळांत येवन ताणें भारतीय नागरीकत्व मेळोवपा खातीर अर्ज केलो.
“हांव हांगाच जल्मलां. हो म्हजो देश. दुर्दैवान हांव नोकरेक लागून पाकिस्तानांत पावलों. घरा परतपा बगर दुसरो पर्याय नाशिल्ल्यान तांचो पासपोर्ट घेतलो आनी उपरांत घरा आयलो,” अशें तांणी सांगलें.
आतां मेरेन अल्पकाळ व्हिसा आशिल्ले पांच जाण केरळांतल्यान भायर सरल्यात. आयतारा मेरेन ज्या व्हिसा धारकांक भारत सोडचो पडला ते 12 वर्ग अशे – आगमनाचेर व्हिसा, वेवसाय, चित्रपट, पत्रकार, प्रवास, परिशद, पर्वतारोहण, विद्यार्थी, सोयऱ्यांक मेळपाक आयिल्ले, गट पर्यटक, यात्रेकरु आनी गट यात्रेकरु.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
