भांगरभूंय | प्रतिनिधी
मडगांव : कोकण रेल्वे पुलिसांक मडगांव रेल्वे स्टेशनाचेर गस्ती वेळार शुक्रारा केरळांतलीं तीन नेण्टीं भुरगीं सांपडिल्लीं. शेनवारा परत केरळांतलीच बेपत्ता आशिल्ली नेण्टी चली कोकण रेल्वे पुलिसांक मेळ्ळी. बालकल्याण समितीच्या सहकार्यान सांपडिल्ल्या सगळ्या नेण्ट्या भुरग्यांक मेरशे अपना घरांत धाडलीं. भुरगीं सांपडिल्ल्याची म्हायती केरळ पुलिसांकूय दिल्या.
कोकण रेल्वे पुलीस बरें काम करतात. ह्या सप्तक भराच्या काळांत मोबायल चोराक धरून ताचे कडल्यान अडेज खालांचे ११ मोबायल जप्त केल्ले. उपरांत कोकण रेल्वे पुलिसांनी शुक्रारा तीन नेण्ट्या भुरग्यांक तांच्या घरा परत धाडले.
मजगतीं, शुक्रारा कोकण रेल्वे पुलीस गस्त घालतना केरळांतल्यान बेपत्ता तीन भुरगीं तांकां सांपडलीं. केरळच्या चेरुथुरुथी पुलीस स्टेशनांत तीग चले २ जानेवारी सावन बेपत्ता आशिल्ल्याची कागाळ नोंद आशिल्ली. त्या पुलिसांक म्हायती दिवन भुरग्यांक अपना घरांत धाडिल्ले. उपरांत आतां शेनवारा रातचें आनीक एक नेण्टी चली रेल्वे स्टेशनाचेर मेळ्ळी. कोकण रेल्वे पुलिसांनी केल्ले चवकशे उपरांत ही चली ३० डिसेंबर २०२४ सावन केरळच्या पट्टाम्बी वाठारांतल्यान बेपत्ता आशिल्ल्याची कागाळ थंयच्या पुलीस स्टेशनांत नोंद आशिल्ली. हे चलयेच्या वैजकी तपासणे उपरांत बाल कल्याण समितीच्या सहकार्यान कोकण रेल्वे पुलिसांनी तिका मेरशेच्या अपना घरांत धाडली. कोकण रेल्वे पोलिसांनी चली सांपडिल्ल्याची म्हायती पट्टाम्बी पुलीस स्टेशनाच्या अधिकार्यांक दिली.
कोकण रेल्वे पुलीस निरीक्षक सुनील गुडलर हांच्या मार्गदर्शना खाला हे विशीं तपास केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
