भांगरभूंय | प्रतिनिधी
मडगांव, प्रतिनिधी ः कोंकण रेल्वे पुलिसांक मडगांव रेल्वे स्टेशनाचेर गस्त घालतना तीन नेण्टीं भुरगीं मेळ्ळी. तांची चवकशी करतना ते केरळांतल्यान आयल्यात हें कळटकच उल्लेख केल्ल्या भुरग्यांक बाल कल्याण समितीच्या हाजिरेंत मेरशेंतल्या अपना घरांत धाडले. तशेंच केरळ पुलिसांकय भुरगीं मेळ्ळ्यात अशी म्हायती दिल्या.
चड म्हायती प्रमाण, कोंकण रेल्वे पुलिसांक रेल्वे स्टेशनाचेर गस्त घालतना तीन भुरगीं प्लॅटफॉर्माचेर बशिल्ली मेळ्ळी. तांचे वांगडा कोणूच नाशिल्ल्यान पुलिसांनी तांची चवकशी केली तेन्ना तीं तीनूय भुरगीं केरळांतल्यान आयिल्लीं अशें कळ्ळें. ते उपरांत कोंकण रेल्वे पुलिसांनी केल्ल्या चवकशे वेळार केरळांतल्या चेरुथुरुथी पुलीस स्टेशनांत उल्लेख केल्ल्या तीनूय नेण्टी भुरगीं 2 जानेवारी सावन बेपत्ता आसात अशी कागाळ नोंद जाल्ल्याची म्हायती मेळ्ळी. ते प्रमाण मडगांव रेल्वे स्टेशनाचेर तिनूय भुरगीं मेळ्ळीं अशी म्हायती चेरुथुरुथी पुलीस स्टेशनांत दिली. उपरांत बाल कल्याण समितीच्या वांगड्यांक आपोवन वैजकी तपासणी करून ह्या तिगांय भुरग्यांक मेरशेंच्या अपना घरांत धाडले.
कोंकण रेल्वे पुलीस निरिक्षक सुनील गुडलर हांच्या फुडारपणा खाला रेल्वे पुलिसांनी ही कारवाय केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
