भांगरभूंय | प्रतिनिधी
तिरुवअनंतपुरम, खबरां संस्था: केरळांत गाजिल्ल्या शेरॉन राज खून प्रकरणांत सत्र न्यायालयान सोमारा ताची मोगिका आनी ह्या खटल्यांतली मुखेल आरोपी ग्रीष्मा (२४) हिका मरणाचे ख्यास्तीचो निकाल दिला. ग्रीष्मान ऑक्टोबर २०२२ वर्सा २३ वर्सां पिरायेच्या शेरॉनचो खून केल्ल्याचें न्यायालयांत सिद्ध जाल्लें. तिचो काका निर्मल कुमार होय ह्या गुन्यांवांत वांटेकार आशिल्ल्याचें सिद्ध जाल्ल्यान ताका तीन वर्सांची बंदखण आयकयली. आवयक निर्दोश सोडल्या.
नियत्तींकरा अतिरिक्त सत्र न्यायालयाचे न्यायाधीश ए एम बशीर हांणी १७ जानेवारीक भारतीय दंड संहितेचें कलम ३६४ (खून करपा खातीर अपहरण), कलम ३२८ (वीख दिवन जखमी करप), ३०२ (खून) आनी २०१ (पुरावे नश्ट करप) खाला ग्रीष्माक दोशी थारायिल्ली. तशेंच तिच्या काकाकूय पुरावे नश्ट करपाच्या आरोपा वेल्यान दोशी थारायिल्लो. ग्रीष्माक अपहरणाच्या गुन्यांवा खातीर १० वर्सां आनी तपासाची दिकाभूल करपाचो यत्न केल्ले खातीर पांच वर्सांची बंदखणूय आयकयल्या.
शेरॉन तिरुवअनंतरपुरमाक रावतालो. ग्रीष्मान आपलें शिक्षणीक येस, शून्य गुन्यांवकारी इतिहास आनी आवय- बापायचें एकटेंच भुरगें आशिल्ल्याचे मुद्दे मुखार करून ख्यास्तींत सवलत मेळची, अशी मागणी केल्ली. मात, गुन्यांवांची खरसाण पळयतना, शिक्षा दितना दोशींची पिराय विचारांत घेवपाची गरज ना अशें न्यायालयान ५८६ पानी निकालपत्रांत स्पश्ट केलें. खुना संबंदी ग्रीष्माच्या गुप्त आनी पयलींच आखिल्ल्या कृत्या कडेन न्यायाधीश बशीर हांणी लक्ष ओडलें. आरोपीन जतनाय घेवन खुनाचें नियोजन केल्ल्याचें न्यायालयान नमूद केलें. निकाला उपरांत शेरॉनची आवय प्रिया हांणी तशेंच तपास अधिकार्यांनी समाधान उक्तायलें.
खुनाचो कट
आरोपपत्रा प्रमाण, ग्रीष्माच्या घरच्यांनी ताचें लग्न दुसर्या चल्या कडेन थारायिल्ले. उपरांत ताका शेरॉना वांगडा नातें सोंपोवपाचें आशिल्लें. हाका लागून ताणें आवय आनी काका वांगडा मेळून शॅरनाक मारपाचो कट रचलो. आवय, बापूय आनी काका घरा नसतना लैंगीक संबंदाचें हांयस दाखोवन शेरॉनाक घरा आपोवन घेतलो. हे खातीर आदले दिसा पुराय रातभर तें शॅरोना कडेन फोनार उलयिल्लें आनी ताका आपल्या घरा येवपाक मनयिल्लो. घरा येतकच च्या बदला ताका आयुर्वेदीक कसायांतल्या वीख दिलें. कसाय घेवन ल्हवू ल्हवू शॅरोनाची भलायकी इबाडली. ताका हाॅस्पिटलांत घाल्लो. २५ ऑक्टोबर २०२२ दिसा ताचे अवयव एकेक करून चलना जाले आनी ताका मरण आयलें. उपरांत ताका वीख दिलां हें उक्ताडार आयलें. ३१ ऑक्टोबराक ग्रीष्मा आनी तिचे आवय, काकाक अटक केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
