केरये- खांडेपारा ट्रकाक स्कुटरीचो धपको; दोग जखमी
भांगरभूंय | प्रतिनिधी
फोंडें: केरये-खांडेपारा रस्त्यार वॉल्त घेता आसतना माती व्हरपी ट्रकाक स्कुटरीचो धपको बसून जाल्ल्या अपघातांत स्कुटर चालक कुणाल अंभोरे (18, तिस्क उसगांव) आनी फाटल्यान बशिल्ली श्रेया सिरसाट (17, प्रतापनगर-धारबांदोडें) जखमी जाली. दोगांकूय रातीं उसरां बांबोळे गोंय वैजकी म्हाविद्यालयांत दाखल केली. फोंडें पुलिसांनी अपघाताचो पंचनामो केला.
मेळिल्ले म्हायती प्रमाण जीए 01 यू 5439 क्रमांकाचो माती व्हरपी ट्रक रस्त्यार वॉल्त घेतालो. त्या वेळार फोंडें सावन तिस्क- उसगांवां वचपी जीए 05 के 9062 क्रमांकाचे स्कुटरीचो धपको ट्रकाक बसलो. हातूंत स्कुटरीचेर बशिल्ले दोगूय रस्त्यार पडून जखमी जाले. जखमींक रोखडेंच फोंडेंच्या उपजिल्हो हॉस्पिटलांत दाखल केले. उपरांत अदीक उपचारा खातीर गोमॅकाँत धाडून दिले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
