भांगरभूंय | प्रतिनिधी
भांगरभूंय । प्रतिनिधी
काणकोणः केबल घालपा खातीर करमलघाट वाठारांत एनएच-66 रस्तो बेकायदेशीरपणान खणपाचें काम चल्लां. ताका काणकोण तालुक्यांतले काँग्रेसचे फुडारी आनी वावुरप्यांनी विरोध केला. ह्या कामाक लागून पयलींच अपघात प्रवण आशिल्ल्या ह्या रस्त्यार चड अपघात जातले अशी भिरांत तांणी उक्तायल्या.
पावसाच्या दिसानी रस्ते खणचे न्हय हे खातीर दक्षीण आनी उत्तर गोंयचे जिल्होधिकारी आदेश काडटात. तरीय रस्ते फोडपाची कामां चलिल्ली दिसतात. हे आदेश फकत फॉर्मेलिटी म्हणून काडटात. तांची अंमलबजावणी करपाक जाय अशें ना असें दिसता अशें प्रदेश युवक काँग्रेशीचो ज्येश्ठ उपाध्यक्ष वैष्णव पेडणेकारान सांगलें.
काणकोण काँग्रेस परिवारचे वांगडी आनी युवक काँग्रेस वावुरप्यांनी करमलघाटार वचून केबली खातीर जें खणपाचें काम चल्लां ताची पळोवणी केली. तांणी चवकशी केली तेन्ना हे खणपाचें काम करपा खातीर संबंदीत यंत्रणे कडल्यान परवानगी घेतिल्ली ना हें तांका दिसून आयलें. पावसाच्या तोंडार केबल घालपा खातीर हें काम चल्लां आनी पावसाच्या दिसांनी येरादारीक ताची आडमेळ जातली अशें दिसून येता.
करमलघाट अपघातां खातीर फेमस आसा. लोक ताका मरणाघाट म्हणटात. रस्त्याचे शॉल्डरिंगाचें काम सारकें जावंक नाशिल्ल्यान थंय जायते अपघात जातात आनी कितल्याश्या लोकांक मरण आयलां. केबल घालपाक खणकाम करून फोण तशेंच वडयले जाल्यार ड्रायव्हराक ह्या घाटार वाहनां चलोवप सामकें धोक्याचें जातलें अशें पेडणेकारान सांगलें. दक्षीण गोंय जिल्होथिकाऱ्यान रस्ते फोडपाक जी बंदी घातल्या ताका पाळो सरकारी अधिकाऱ्यांनी पाळो दिवंन करमलघाटांत चलिल्लें काम बेगोबेग बंद करचें अशी मागणी ताणे केल्या.
पेडणेकार हाच्या वांगडा गोंय प्रदेश काँग्रेस समितीचो सरचिटणीस गास्पार कुतिन्हो, विशाल पागी हांणी करमलघाटार चलिल्ल्या कामाची पळोवणी केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
