भांगरभूंय | प्रतिनिधी
एल्टन डिकॉस्टाः केपें मतदारसंघांत युनिटी रन जनजागृतीक सुरवात
भांगरभूंय । प्रतिनिधी
केपें: केप्यां कसलेंच राजकारण आपूण सोंसून घेवचों ना. तातूंत राजकारण्यांचो फायदो जाता, पूण लोकांक लुकसाण सोंसचें पडटा. आदीं सावन हें चलत आयलां. पूण हे मुखार केपेंच्या लोकांचें लुकसाण जावचें ना, हाची आमी सगळ्यांनी जतनाय घेवपाक जाय, अशें केपेंचे आमदार एल्टन डिकॉस्टा हांणी सांगलें.
सरदार वल्लभभाई पटेल हांचे 147 वे जयंती निमतान खेळां आनी युवा वेव्हार खात्या वतीन केपें मतदारसंघांत युनिटी रन जनजागृती रॅली आयोजीत केल्ली. हातूंत आमदार डिकॉस्टा हांणी वांटो घेतलो. बाळ्ळी वाठारांत रॅलीक पांचवो बावटो दाखोवपाच्या सुवाळ्यांत ते उलयताले.
ह्या वेळार बाळ्ळीचे सरपंच गोविंद फळदेसाय, मोरपिर्लाचे पंच नागेश वेळीर, बार्सेची पंच विटे वेळीप, खेळां आनी युवा वेव्हार खात्याचे अधिकारी, विद्यार्थी आनी हेर मानेस्त हाजीर आशिल्ले.
सरदार वल्लभभाई पटेल हांकां लोहपुरूस म्हूण वळखतात. तांचे आदर्श घेवन आमी मुखार वचपाक जाय. केपेंच्या लोकांनी केपेंचे उदरगती खातीर एकठांय येवचें. केपेंची स्थिती खुबूच इबाडल्या. केपेंचे सरकारी शाळेची स्थिती पळयल्यान खूब दुख्ख जाता. आयज आमकां ह्यो सगळ्यो समस्या सोडोवपाक जाय. ते खातीर सरपंच, पंच आनी लोकांक विस्वासांत घेवन केपेंचीं उदरगत कामां पुराय करतलों, अशें आमदार डिकॉस्टा हांणी सांगलें. ही जनजागृती रॅली बाळ्ळी ते फातर्पें मेरेन आयोजीत केल्ली. हाका लोकांचो बरो प्रतिसाद मेळ्ळो. आमदार डिकॉस्टा हांणी बाळ्ळी ते फातर्पे मेरेन रॅलींत वांटो घेतलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
