भांगरभूंय | प्रतिनिधी
पणजी ः केपें तालुक्यांत आनी दक्षीण गोंयांत संगीत कार्यावळींच्या नांवान हावझी वा तांबोला सारकिल्ले खेळ घडोवन हाडटात. व्हड इनामां आनी रंगीत कार्यावळींक लागून हो प्रकार हांगाच्या लोकां मदीं खूब लोकप्रिय जावपाक लागलां. अशे खेळ जुगाराच्या कायद्या खाला येतात आनी ताका संबंदीत अधिकाऱ्यांकडल्यान गरजेचे परवाने घेवचे पडटात. संगीत कार्यावळीं खातीर दिल्ल्या परवान्यांचो गैरवापर करून हावझी घडोवन हाडटात हें लक्षांत आयले उपरांत 23 मार्चाक दक्षीण गोंयचे अधीक्षक टिकम सिंह वर्मा हांणी गोंयभर अशो घडणुको घडिल्ल्याचे नदरेक आयल्यार खर कारवाय करची अशें निर्देश दिल्ले.
मजगतीं, 31 मार्चाक आयोजीत केल्ली अशीच एक कार्यावळ केपें सरकारी खेळां संकुलांत जाली. हाचे उपरांत ह्या कार्यावळीचेर कसलीच कारवाय कित्याक जाली ना? अशें केपेंचे उपजिल्लोधिकारी मनोहर कारेकार हांणी केपें पुलिसांक विचारले. तशेंच पुलीस अधीक्षकांच्या सुचोवण्यां कडेन दुर्लक्ष केल्ल्या विशीं आनी सरकारी खेळां संकुलांत ह्या प्रकारची कार्यावळ कशी घडोवन हाडली? हे संबंदी संबंदीत खात्याच्या अधिकाऱ्यांक विचारलें.
विशेश म्हळ्यार आयज आनी सोमारा केपें शारांत आनीक दोन अशोच ग्रँड हावझी इवेंट्स घडोवन हाडटले अशी म्हायती मुखार आयल्या. संगीत महोत्सवाचो कार्यक्रम घडोवन हाडपाची परवानगी घेवन हावझीचें आयोजन करतात. आयज जावपी कार्यावळींत पांच लाख रुपयांचें इनाम, जाल्यार सोमारा जावपी कार्यावळींत 15 लाख रुपयांचें इनाम आसतलें. अशींच व्हड इनामां दवरुन आयोजक लोकांक आकर्शीत करतात.
मजगतीं, केपेंचे उपजिल्लोधिकारी मनोहर कारेकार हांणी मेमो जारी करून 31 मार्चाक सरकारी खेळां संकुलांत जाल्ले कार्यावळी संबंदी अहवाल सादर करपाचे निर्देश दिला. तशेंच तातूंत कसलीच चूक मेळ्ळी जाल्यार संबंदीत आयोजकाचेर कायदेशीर कारवाय करची अशेंय सांगलां. तशेंच आयज आनी सोमारा जावपी कार्यावळींत व्हड प्रमाणांत पुलीस तैनात करचें. तशेंच मामलेदार आनी तलाठी दवरचें आनी संबंदीत कार्यावळीच्या आयोजकांनी गरजेच्यो कायदेशीर अटी पुराय करुन गरजेच्यो परवानगी घेतल्यात कांय ना हाची खात्री करची अशएंय आदेशांत म्हणलां. ह्या आनी फुडाराक आयोजीत करपी कर्यावळींची ऑडिओ-व्हिडिओ रेकॉर्डिंग करची आनी २४ वरांत ताचो अहवाल जिल्लोधिकारी कार्यालयांत सादर करचो अशएंय अहवालांत म्हणलां.
‘हावझी’ बंद करपाचो दक्षीण जिल्लोधिकाऱ्यांक आदेश
दक्षीण गोंयांत संगीत शो, फुटबॉल सर्ती, कराओके सर्तीच्या नांवान जायत्या सुवातींनी हावझी खेळ घडोवन हाडटात. हे खातीर लाखांनी रुपयांची इनामां आसतात. ह्या प्रकरणांत नागरिकांनी जिल्लोधिकारी आनी उपजिल्लोधिकाऱ्या कडेन कागाळी केल्यात. हाची दखल घेवन दक्षीण गोंय जिल्होधिकारी एग्ना क्लिटस हांणी शुक्रारा दक्षीण गोंयच्या सगल्या उपजिल्लोधिकाऱ्यांची बसका घेतली. तातूंत तांणी संगीत कार्यावळींक परवानगी दितना कांय नेम आनी अटी घालपाची सुचोवणी केली. तशेंच त्या सुवातेर मामेलदार वा तलाठी तैनात करप, परवानगी अर्ज मेळ्ळ्या उपरांत ताची खात्री करपाचें सांगलें. हाचे भायर तांकां संगीत कार्यावळींचे वा हेर कार्यावळींचे व्हिडियो रेकॉर्डिंग करपाकूय सांगलां. अशे परिस्थितींत त्या सुवातेर हावझी वा हेर प्रकारचे जुगार खेळटात अशें दिसल्यार पुलिसांक म्हायती दिवन अशे तरेचे काम बेगोबेग बंद करपाचो आदेश दिला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
