भांगरभूंय | प्रतिनिधी
पणजी ः केपें भौशीक गणेशोत्सव मंडळाच्या ‘महाप्रसाद पावती 2025’ लकी ड्रॉक ह्या वर्साय व्हड प्रतिसाद मेळ्ळा. शेनवारा सकाळीं सोर्त विक्री सुरू जातकच केपेंच्या खेळां संकुला पसून तिळामळ जंक्शना मेरेन सुमार दोन किलोमीटर पयस हजारांनी लोकांची रांक लागिल्ली. दर वर्सा प्रमाण अंदूं लेगीत आकर्शक लक्झरी गाडयो इनामां म्हणून दवरल्यात, ताका लागून राज्यभरांतले आनी शेजारच्या राज्यांतले लोक सोर्त कूपन घेवपाक केपें वटेन आकर्शीत जावपाक लागल्यात.
अंदूं लकी ड्रॉ खातीर सुमार देड लाख कूपन छापून आयल्यात. हाचे वरवीं मेळपी निधी धर्मीक, संस्कृतीक, शिक्षणीक आनी समाजीक कार्यावळीं खातीर खर्च करतात. ह्या निधींतल्यान विद्यार्थ्यां खातीर शिश्यवृत्तीय दितात. केपें पुलीस आनी येरादारी खात्यान योग्य नियोजन करून गर्देचेर नियंत्रण दवरलां.
अंदूंच्या लकी ड्रॉचें मुखेल आकर्शण म्हळ्यार 20 लक्झरी गाडयो आनी एसयूव्ही. तातूंत BMW 5 सिरिज, ऑडी Q3, टोयोटा इनोवा हायक्रॉस, महिंद्रा थार ROXX, किआ सेल्टोस, ह्युंदाई क्रेटा, ग्रँड विटारा, टाटा कर्व्ह, एमजी विंडसर EV, महिंद्रा BE 6 हांचो आसपाव आसा. हाचे भायर मारुती फ्रॉन्क्स, स्कोडा कुसाक, किआ सॉनेट, टाटा नेक्सॉन, डिजायर, ब्रेझा, वेन्यू, अॅमेझ सारकिल्ल्यो गाडयोय इनामां म्हणून जाहीर केल्यात.
केपें भौशीक गणेशोत्सव मंडळाची थापणूक १९८८ वर्सा जाली आनी २००२ वर्सा अधिकृतपणान नोंदणी जाली. गणेशोत्सवा वेळार मंडळ धर्मीक कार्यावळी, संगीत नाटकां, विद्यार्थ्यांचो भोवमान, शिश्यवृत्ती वांटप आनी वेगवेगळे समाजीक कार्यावळी घडोवन हाडटात. फाटल्या वर्साय मंडळान टोयोटा फॉर्च्यूनर, महिंद्रा XUV700, जीप कंपास, टाटा सफारी आनी जायत्यो दुचाकी गाडयो इनामां म्हणून दिल्ल्यो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
