भांगरभूंय | प्रतिनिधी
केपें: केपें पालिकेंतल्यान सेगीत तीन फावटी नगरसेवक म्हूण वेंचून आयिल्ले अमोल काणेकार हांची केपें पालिकेच्या उपनगराध्यक्षपदार बिनविरोध निवड जाली. वट्ट 13 प्रभाग आशिल्ले हे पालिकेचेर भाजपाचें वर्चस्व आसा. विल्यम फर्नांडीस हांणी आपल्या उपनगराध्यक्षपदाचो राजिनामो दिले उपरांत हें पद रितें आशिल्लें.
अमोल काणेकार हांचो भाजप समर्थक गटा कल्यान एकूच अर्ज आयिल्लो. तशेंच विरोधी गटा कडल्यान एकूय अर्ज येवंक नाशिल्ल्यान काणेकार बिनविरोध वेंचून येवपाचो मार्ग मेकळो जाल्लो. काल (शुक्रारा) काणेकार वेंचून आयिल्याचें रितसर जाहीर केलें. ह्या वेळार निर्वाचन अधिकारी म्हूण मिलिंद्र वेळीप, मुख्याधिकारी लक्ष्मीकांत देसाय, नगराध्यक्ष दीपाली नायक, नगरसेवक दयेश नायक, प्रसाद फळदेसाय, गणपत मोडक, चेतन हळदणकार, सुचिता शिरवयकार, विल्यम फर्नांडीस, आलिन्डा लासेन्डा, जाकीना डायस हाजीर आशिल्ले.
ह्या वेळार आदले उपमुख्यमंत्री चंद्रकांत कवळेंकार हांणी आमोल काणेकार हांकां शुभेत्सा दिल्यो.
केपेंच्या विकासकामां खातीर हांव वचनबद्ध आसा. चंद्रकांत कवळेंकार हांच्या फुडारपणा खाला केपें भाजपाचें काम गतीन चालू आसा. म्हजी निवड केल्ले खातीर मुख्यमंत्री डॉ. प्रमोद सावंत भाजप अध्यक्ष दामू नायक, आदले उपमुख्यमंत्री चंद्रकांत कवळेंकार आनी सगल्या नगरसेवकांचो हांव उपकारी आसा अशें अमोल काणेकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
