भांगरभूंय | प्रतिनिधी
सुरवातूच चुकीची जाली वा कितें वायट घडलें जाल्यार, म्हुर्ताकूच कुसको नाल्ल, अशें म्हणपाची पद्दत आसा. 2024 वर्साच्या पयल्याच दिसा कांयशें अशेंच घडलां. ह्या नव्या वर्सान बरें कितें तरी घेवन येवचें, आपल्या जिवितांत एखादी खोसदिणी गजाल घडची, अशें सगल्यांकूच दिसता. पूण काल जें कितें घडलें तें पळयल्यार दरेका संवेदनशील मनशाचें काळीज रडलां आसतलें. चार अपघातांत चौगांक मरण आयलें. तातूंत दोग जाण विशींतले तरणाटे आसात. गोंयांत 1980 च्या दसका सावन अपघात वाडले. कारण प्रत्येका कडेन वाहनां आयलीं. त्या वेळाच्या राज्यपालान गोंय हें मरणाचें राज्य अशें म्हणिल्लें. चार दसकां हुपल्यांत, पूण अपघात काय उणें जावंक नात. वर्साक सरासरी 250 ते 300 लोकांक गोंयांतल्या रस्त्यांचेर मरण येता. ताचे दुपेटीन, तिपेटीन जखमी जातात. तातूंतले कांय जाण अपंगूळ जातात आसतले. केन्ना थारतलो हो मरणाचो खेळ? गोंयचो मरणकट्टो जाला, तो आडावप आमच्या हातांत ना?
जानेवारीच्या पयल्या दिसा पणजे दोगांक मरण आयलें. 21, 22 वर्सां पिरायेचे हे तरणाटे. तांचे मुखार उबें जिवीत पडिल्लें. तांणी जायतीं सपनां पळयिल्लीं. तीं सगलीं मातये भरवण जाल्यांत. वाळपय आनी ताळगांवां दोगांक मरण आयलें. आदले दीस भोमा एकलो तरणाटो गेलो, तोय आपलो वाडदीस मनोवपाचे कांय खीण पयलीं. कितें म्हणपाचें हाका? पणजे मळ्यांत बुलेट फोंडकुलांत पडून आदल्या नगरसेवकाच्या पुताक मरण आयलें. पणजी फाटल्या दोन वर्सां सावन स्मार्ट जाता. तिका हो मेकअप वा मेकओव्हर करपाक आनीक कितलीं वर्सां लागतलीं तें कळना. जालां तें काम सारकें जावंक ना. देखून कितेंय जाल्यार संबंदीत काम करपी कंत्राटदार ताका जापसालदार आसतलो, अशें खुद्द आमदारान फाटीं म्हणिल्लें. हाचे वयल्यान पणजेकारांनी आनी कामा, धंद्या निमतान सद्दां पणजे येवपी हजारांनी लोकांनी कितें तें समजुचें. ह्या वर्सा हीं कामां सोंपतलीं खंय. मात कामां जाल्यांत, थंयच आतां व्हडलीं फोंडकुलां खणल्यांत. शिमीट घट जावपाक तीं चार- आठ दीस तशींच दवरतात आनी मागीर थंय अपघात जातात. मळ्यांतल्या अपघाताक संबंदीत रस्तो काॅण्ट्रेक्टरूच जापसालदार आसा, असो थळाव्यांचो दावो. सिवरेज पायपां घालपाचें थंय काम चलतालें. फुडले तीन म्हयने तरी तें चलतलें. सुपरवायजराच्या मतान, फोंडकुलाक लागून अपघात घडचे न्हय, म्हूण थंय बॅरिकेड्स लायल्यात. रस्त्या वयली माती काडल्या. देखून काॅण्ट्रेक्टराची कांय चूक ना. फाटले दोन दीस थंय लायट नाशिल्ली खंय. काळखांत येतना अचकीत बॅरिकेड्साक आपटून हो तरणाटो बुलेटी सयत भितर पडलो. थंयच आडकून उरलो खंय. रातच्या वेळार त्या जाग्यार कोणूच नाशिल्लो. बॅरिकेड्स, फळयो लायिल्ल्यो ताचेर दिवो वा रेडियमाच्यो पट्ट्यो लायिल्ल्यो जाल्यार ह्या रस्त्यान वचप्यांक सादूर रावपाक मेळपाचें. अर्थांत बुलेट कितल्या वेगान आशिल्ली तें कळपाक मार्ग ना. पूण ह्या अपघातांत एक तरणाटो गेलो, ही दुख्खाची गजाल.
फाटीं सांतिनेज चिरे व्हरपी ट्रक उमथून एक कामगार जखमी जाल्लो. स्मार्ट सिटीचे रस्ते जाल्यात ते सपाट जावंक ना. म्हणल्यार गुळगुळीत रस्तो खंय खोल आसा आनी खंय उंच तें प्रत्यक्ष गाडी व्हरतना वा वयल्यान चलतना कळटा. सारके केल्ले रस्ते परत खणल्यात, एकदां न्हय दोनदां. अंदूं दिवाळे मेरेन तरी हें काम सोंपचें. सध्याची रस्त्यांची परिस्थिती पळयल्यार, पणजेंतले कामां चलतात ते सगले रस्ते हाॅटमिक्स करचे पडटले, अशें दिसता. काँक्रिटाच्या रस्त्यांचेर पसून हात भोंवडावचो पडटलो. अपघात जातात, ताका रस्त्याची स्थिती जापसालदार आसताच, पूण कांय फावटी गाडी चलोवप्याचीय चूक आसता. पुलीस प्रत्येक अपघाताचें कारण सांगपाक वचनात. कांय वेळार चलोवपी नशेंत आसता, झेमेंत आसता, आबूज जाता, आपल्याच विचारांत तल्लीन आसता, अतिशाणो आसता, स्वताचेर फाजील विस्वास आसता, दोळे दिपकावतात, गाडी वेगान आसता, रस्त्याचो अदमास आसना, गोरवां, सुणीं आडवीं येतात, मोबायलाचेर नदर आसता, गर्लफ्रेंड वा
कुशीक बशिल्ल्या कडेन गजाली मारपाच्या नेटार थोडे आसता… खूब कारणां आसात. पूण, अचकीत एक खीण असो येता की आशिल्ल्याचें नाशिल्लें जाता. तेन्ना दरेकल्यान जागृत रावन गाडी चलोवपाक जाय! अपघातांची ही माळ थांबूं!
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
