केन्नाच हार मानू नाकात : फ्लायट लेफ्टनंद मारिया शांती

भांगरभूंय | प्रतिनिधी

शिस्तच सशस्त्र दळाचें वेगळेपण दाखयता आनी हे गूण फकत संरक्षणांत न्हय तर जिणेंत येस मेळोवपा खातीर गरजेचे आसात.

सलाम फौजी

फ्लायट लेफ्टनंट मारिया शांती अमारंते लुर्डेस एस्पेरान्का चावेस रेव्हेरेदो हिणें वायुसेनेंतली पयली गोंयकार बायल हवाई येरादारी नियंत्रण अधिकारी म्हूण इतिहास घडयला. 

विमान येरादारी नियंत्रण अधिकारी म्हूण फ्लाइट लेफ्टनंट मारिया हिणें विमानांची सुरक्षीत उड्डाण आनी उतार सुनिश्चीत करपाक म्हत्वाची भुमिका साकारली. वायुसेनेंत बायलांची वाडत वचपी उपस्थिती, आडमेळीं मोडून फुडल्या पिळग्यांक प्रेरणा दिवपी तिचें यश ही एक गवाय.

तिचो प्रवास खऱ्या अर्थान प्रेरणादायक आसा. 24 मे 1996 दिसा पायलट ऑफिसर म्हणून कमिशन मेळ्ळें आनी फुडें तिणें दुंडीगलांतल्या वायुसेना अकादेमींत मुळावो हवाई येरादारी नियंत्रण अधिकारीचो अभ्यासक्रम पुराय केलो. तिचो सेवा काळ बरोच प्रभावी जाला. वेगवेगळ्या वायुसेनेच्या स्टेशनां वयल्यान पोस्टिंग केल्ल्यान तिणें डॅटको, स्टेशन कायदेशीर अधिकारी, आनी प्रशासकीय अधिकारी अश्यो मुखेल भुमिका केल्यात. 

तिची शिक्षणीक फाटभूंयय प्रभावी आसा. सेंट एन कॉन्व्हेंट थावन व्ही. एम.साळगांवकार कॉलेज ऑफ लॉ मेरेन तिणें एक अद्भुत शिक्षणीक प्रवास केला. आयएएफांतल्यान सुटके उपरांत मानवी हक्कांत एलएलएम घेवप हें तिची सतत शिकपाची वचनबद्धताय दाखयता. सूक्ष्मजीवशास्त्र ते कायदो मेरेनच्या विंगड विंगड विशयांची श्रेणी तिच्या बहुमुखी प्रतिभा आनी गिन्यानाची आवड हांचे विशीं खूब उलयता.

तिचीं मुळां गोंयां कडेन खोलायेन जोडिल्लीं आसात. सर्गेस्त आंतोनियो जुलियो चावेस आनी अडोल्फिना क्विटेरिया ए. सी. कार्दोझ ई चावेस हांच्या घरांत जल्मल्ल्या मारिया हांणी पणजेचो बँकर फ्रांसिस्को एफ. जे. डी. रेव्हर्दो हाचे कडेन लग्न केलां. डॅरेन आनी डार्नेल ह्या दोन पूतांची ती आवय. सेवेंतल्यान सुटके उपरांत फ्लाइट लेफ्टनंट मारिया शांती आपलो अणभव आनी तज्ञताय वापरून गोंयच्या समाजीक आनी शिक्षणीक क्षेत्रांत सकारात्मक परिणाम करपाक लागल्या. दुसऱ्यांची सेवा करपाची तिची वचनबद्धताय खऱ्या अर्थान प्रेरणादायक आसा.

तिच्या सपनांक घट्ट बुन्याद मेळ्ळी‌ ती वकिल सी एफ आल्वारीसाच्या ऑफिसांत काम करून. बार कावन्सिलांत नोंदणी करून तिका कायदेशीर संवसाराची चव मेळ्ळी. आनी तिची भयण तेरेजान तिका फुडें सरपाक आधार दिलो. तिणें नेमाळीं मेळोवन दिली आनी तिच्या पापाच्या मार्गदर्शनान एएफएसबीची तयारी करप जाले. आनी शारिरीक रितीन स्वताक तिणे घडयली. खास करून सकाळीं जॉगिंग करप फायदेशीर‌ थारलें.

1995 इस्वेच्या सुरवेक तिणें बायलांक लश्कराच्या जॅग (कायदो) शाखेंत भरती जावंक आपयल्ली जाहिरात पळयली. तिणें अर्ज केलो. थोड्याच दिसांनी वायू दलांत बायलांक आयएएफांत एअर ट्रॅफिक कंट्रोलर आनी फायटर कंट्रोलर म्हणून काम करपाक जाहिरात आयली, तिणें ताचे खातीरय अर्ज केलो. दोनूय कडेन ती  शॉर्टलिस्ट जाल्ली, तिची आर्मी एसएसबी अलाहाबाद आनी एअरफोर्स एएफएसबी म्हैसूरांत जावपाची आशिल्ली. तिणें क्रमांक 2 एएफएसबी म्हैसूर हांगा वायुसेनेच्या निवडी खातीर वचपाचें थारायलें. 

एएफएसबीच्या पयल्या दिसा स्क्रीनिंग चांचणी जाली आनी उपरांत फकत 15 जाणांक आनीक 5 दीस परत रावपाक सांगलें. फुडल्या पांच दिसांनी तांकां मानसीक, शारिरीक चांचण्यो, गट कामां, वैयक्तीक कामां, गट चर्चा, मुलाखत आदी करून तांकां ओएलक्यू (अधिकारी जावपा सारके गूण.) आसात काय नात तें सोदून काडपाचो यत्न केलो आनी निमाणें निमाण्या दिसा तातूंतल्या तीग जाणांची शिफारस केली आनी तांकां वैजकी संबंदीत सुचोवण्यो मेळपाची वाट पळोवपाक सांगलें.

सुमार दोन म्हयन्यां उपरांत तिका आयएएफ कडल्यान आयएएम (इन्स्टिट्यूट ऑफ एरोस्पेस मेडिसीन) बंगलोरांत जावपी मेडिकलाची म्हायती दिवपी पत्र मेळ्ळें. ही गजाल डिसेंबर 1995 वर्साची. वैजकी मंडळान तिची शिफारस केली. निमाणे 3 मार्च 1996 दिसा वायुसेनेच्या प्रशासकीय म्हाविद्यालयांत, कोयंबतूरांत तिचें प्रशिक्षण सुरू जालें.

फ्लॅट लेफ्टनंट मारिया शांती हांणी सांगलें की शिस्तच सशस्त्र दळाचें वेगळेपण दाखयता आनी हे गूण फकत संरक्षणांत न्हय तर जिणेंत येस मेळोवपा खातीर गरजेचे आसात. वेळार पाळो दिवप, प्रामाणीकपण आनी प्रामाणीकपणच ही बुन्याद आनी गोंयच्या संरक्षण आकांक्षींनी जर हीं मुल्यां आत्मसात करत जाल्यार ताची वाटचाल यशा कडेनूच जातली.

सशस्त्र दळांत भरती जावपाचेर ती म्हणटा, हें आव्हानात्मक आसा, पूण ताचे इनाम फायद्याचे. लक्ष केंद्रीत दवरप आनी केन्नाच हार मानप ना  हें मुखेल. तुमी तयार केल्लीं बंधनां, कामरेडरी आनी तांच्यात आशिल्ली एकजूट, उत्साह, अभिमान आणि आपलेपणाची भावना— हो एक आगळोच अणभव  दिता.

सलाम फौजी